کراچی: صوبہ سندھ کے دارالحکومت کراچی کی سیاحت پر آنے والا جاپانی شہری اورنگی ٹاؤن پہنچ گیا، جس کے بعد پولیس نے اسے حفاظتی تحویل میں لے لیا۔
تفصیلات کے مطابق ویسٹ زون پولیس نے کراچی کے علاقے اورنگی ٹاؤن میں بھٹکتے غیر ملکی کو حفاظتی تحویل میں لے لیا، پولیس کا کہنا ہے کہ واقعہ چند روز قبل پیش آیا تھا۔
پولیس حکام کا کہنا ہے کہ جرائم پیشہ عناصر کے لیے اسنیپ چیکنگ کا عمل جاری تھا، اسی دوران جاپانی شہری تاماذاکی تاکیویا کو روکا گیا، غیر ملکی کو فوری حفاظتی تحویل میں لے لیا گیا اور افسران بالا کو صورتحال سے آگاہ کردیا گیا۔
پولیس کے مطابق جاپانی شہری کو ایس ایس پی سہائی عزیز کے دفتر پہنچایا گیا ہے۔ مذکورہ غیر ملکی علاقوں سے ناواقف تھا اور اورنگی ٹاؤن تک آگیا تھا۔
سہائی عزیز نے جاپانی باشندے کی مہمان نوازی کی اور اسے بحفاظت فارن سیکیورٹی سیل پہنچا دیا گیا۔ جاپان قونصلیٹ نے جاپانی شہری کی مدد پر پولیس کی تعریف کی اور شکریہ ادا کیا۔
پولیس کا مزید کہنا ہے کہ تاماذاکی تاکیویا دنیا کی سیر پر نکلا ہے، وہ 2 روز قبل تک سندھ کے شہروں میں گھوم رہا تھا۔
اس سے قبل ایک چینی شہری بھی راستہ بھٹک کر کٹی پہاڑی کے علاقے میں جا پہنچا تھا، اطلاع ملنے پر پولیس پارٹی فوراً کٹی پہاڑی پہنچی اور چینی شہری کو ڈھونڈ کر پولیس پروٹیکشن میں ہوٹل روانہ کیا گیا۔
