انٹرنیشنل کرکٹ کونسل (آئی سی سی) نے بھارتی فاسٹ بولر جسپریت بمراہ کو آئی سی سی ٹیسٹ کرکٹر آف دی ایئر قرار دے دیا۔

آئی سی سی کی جانب سے بھارتی کرکٹر جسپریت بمراہ کو کرکٹر آف دی ایئر قرار دیا گیا ہے جبکہ سری لنکا کے کیندو مینڈس آئی سی سی کی جانب سے مینز ایمرجنگ کرکٹر آف دی ایئر قرار پائے ہیں۔

جسپریت بمراہ نے گزشتہ سال صرف 13 میچوں میں 71 وکٹیں حاصل کی ہیں۔

فاسٹ بولر نے گزشتہ سال ٹیسٹ کرکٹ میں اپنی 200 وکٹیں بھی مکمل کیں جس کے بعد وہ 200 وکٹیں حاصل کرنے والے 12ویں بھارتی بولر بن گئے۔

بارڈر گواسکر سیریز میں بھی جسپریت بمراہ نے پانچ میچوں میں آسٹریلیا کے خلاف 32 کھلاڑیوں کو آؤٹ کیا لیکن آخری اننگز میں وہ کمر کی تکلیف کے سبب بولنگ نہیں کرسکے تھے۔

آئی سی سی کے مطابق مینز ایمرجنگ کرکٹر آف دی ایئر سری لنکا کے کمیندو مینڈس قرار پائے ہیں۔

کمیندو مینڈس نے 2024 میں تمام فارمیٹ میں مجموعی طور پر 32 مچیز میں 1451 رنز اسکور کیے تھے۔

26 سالہ کیمیندو مینڈس نے 2024 میں صرف 9 ٹیسٹ میچز میں 5 سنچریوں کی بدولت 1049 رنز بنائے ان کا سب سے بہترین اسکور 182 رنز ناٹ آؤٹ رہا ہے۔

واضح رہے کہ آئی سی سی مینز ایمرجنگ کرکٹر آف دی ایئر ایوارڈ کے لیے پاکستانی کرکٹر صائم ایوب، انگلینڈ کے فاسٹ بولر گس اٹکنسن، سری لنکا کے کمیندو مینڈس اور ویسٹ انڈیز کے شمر جوزف نامزد ہوئے تھے۔