کراچی: عمرہ ادائیگی کے بعد زائرین کی پاکستان واپسی نے فلائٹ شیڈول کو شدید متاثر کردیا ہے۔
اے آر وائی نیوز کے مطابق سعودی عرب سے عمرہ زائرین کی وطن واپسی کے نتیجے میں جدہ ائیرپورٹ کے نارتھ ٹرمینل پر غیر معمولی رش دیکھا جارہا ہے جس کے باعث فلائٹ آپریشن بری طرح متاثر ہوا ہے۔
ذرائع کا کہنا ہے کہ جدہ ائیرپورٹ پر غیر معمولی رش کی وجہ مسافر پریشانی کا شکار ہورہے ہیں، سیکیورٹی چیکنگ اور مسافروں کی لمبی قطاریں لگنے کی وجہ سے امیگریشن کا عمل بھی بری طرح متاثر ہورہا ہے۔
ذرائع نے بتایا کہ فلائٹ آپریشن طرح متاثر ہونے کے باعث پاکستان آنے والی پروازیں تین سے سات گھنٹے تاخیر کا شکار ہورہی ہیں، جہازوں کی پارکنگ اور مسافروں کو جہاز تک پہنچانے کے لیے پل کی عدم دستیابی بھی تاخیر کی وجوہات میں شامل ہیں۔
یہ بھی پڑھیں: ‘عمرہ زائرین کی بڑی مشکل آسان ہوگئی ‘
ذرائع کا کہنا ہے کہ یہ صورت حال صرف پی آئی اے کے ساتھ نہیں، تاخیر سے آنے والی پروازوں میں پی آئی اے کے ساتھ نجی و غیر ملکی ائیر لائن بھی شامل ہیں۔
واضح رہے کہ چند روز قبل سعودی وزارت حج وعمرہ نے مملکت میں موجود عمرہ زائرین کو ہدایت کی تھی کہ وہ واپسی سے قبل سفری ضوابط پر عمل کریں تاکہ انہیں کسی قسم کی دشواری کاسامنا نہ کرنا کرنا پڑے۔
