کراچی : مئیر کراچی الیکشن کے پر قبضے کے خلاف جماعت اسلامی نے آج ملک بھر میں یوم سیاہ منانے کا اعلان کردیا، شام میں شاہراہ قائدین پر جماعت اسلامی کا احتجاج ہوگا۔
تفصیلات کے مطابق پیپلز پارٹی کی فسطائیت و جمہوریت دشمن رویے، مینڈیٹ پر ڈاکے اور الیکشن پر قبضے کے خلاف جماعت اسلامی نے ملک گیر یوم سیاہ کا اعلان کیا ہے۔
امیر جماعت اسلامی پاکستان سراج الحق کی اپیل پر ملک گیر سطح پر یوم سیاہ منایا جائے گا، ہاتھوں پر سیاہ پٹیاں باندھی جائیں گی اور آج شام 5 بجے کراچی میں نورانی کباب ہاوٴس چورنگی شاہراہ قائدین پر احتجاج کیا جائے گا، جس میں حافظ نعیم خطاب کریں گے۔
امیر جماعت اسلامی کراچی حافظ نعیم الرحمان نے مطالبہ کیا ہے کہ اس جعلی انتخاب کو کالعدم قرار دے کر از سر نو شیڈول جاری کیا جائے۔
حافظ نعیم الرحمان کا کہنا تھا کہ پولیس کی سرپرستی میں پر امن کارکنوں پر تشدد،پتھراوٴ اور لاٹھی چارج سے کئی کارکنان زخمی ہوئے جس کی ہم شدید مذمت کرتے ہیں۔
انھوں نے مزید کہا کہ میئر کے جعلی انتخاب اور غیر جمہوری و غیر آئینی عمل کو مسترد کرتے ہیں،15جون کا دن نہ صرف کراچی بلکہ پورے سندھ اور ملک کی جمہوری تاریخ کا بدترین دن ہے۔
امیر جماعت اسلامی کراچی کا کہنا تھا کہ پیپلز پارٹی اور سندھ حکومت نے حکومتی جبر و تشدد اور الیکشن کمیشن کی ملی بھگت سے زبردستی عوامی مینڈیٹ پر قبضہ کیا، 15جون کو جمہوریت کا گلا گھونٹا گیا، جماعت اسلامی کراچی کے ساڑھے تین کروڑ عوام کے جائز اور قانونی حقوق کے حصول اور مسائل کے حل کی جدو جہد جاری رکھے گی۔
