جارجیا: دستی بیلٹ گنتی کے بعد نومنتخب امریکی صدر جو بائیڈن کو جارجیا میں بھی فاتح قرار دے دیا گیا۔
تفصیلات کے مطابق جارجیا میں جو بائیڈن کی فتح کے ساتھ 1992 کے بعد پہلی بار کسی ڈیموکریٹک صدارتی امیدوار نے ریاست جارجیا میں فتح حاصل کی ہے۔
امریکی میڈیا کے مطابق بائیڈن نے جارجیا کے 16 الیکٹورل کالج ووٹ حاصل کیے ہیں، جس کے بعد امریکی صدر ڈونلڈ ٹرمپ کے 232 کے مقابلے میں جوبائیڈن کو 306 الیکٹورل کالج ووٹوں کے ساتھ بڑی برتری حاصل ہو گئی ہے۔
ادھر جوبائیڈن نے کہا ہے کہ ڈونلڈ ٹرمپ کو تاریخ میں غیر ذمہ ترین صدر کہا جائے گا، جوبائیڈن نے نیوز کانفرنس میں کہا کہ امریکی عوام ٹرمپ کی غیر ذمہ داری کا مظاہرہ دیکھ رہے ہیں، ٹرمپ کے اقدامات انتہائی خطرناک ہیں۔
نو منتخب صدر کا کہنا تھا کرونا سے بچاؤ کے لیے معیشت کو شٹ ڈاؤن نہیں کریں گے، انتظامیہ کی تشکیل جاری ہے، آئندہ ہفتے وزیر خزانہ کا اعلان کر دیں گے۔
بائیڈن نے نیوز کانفرنس سے پہلے ریپبلکن اور ڈیموکریٹس گورنرز سے ملاقات بھی کی، آن لائن ملاقات میں کرونا وائرس سے نمٹنے کی حکمت عملی پر غور کیا گیا۔
دوسری طرف صدر ڈونلڈ ٹرمپ کے وکیل روڈی جولیانی نے پریس کانفرنس میں کہا کہ غیر قانونی ووٹوں کے مستند ثبوت موجود ہیں۔
