لاہور: پنجاب کے دارالحکومت لاہور کے علاقے جوہر ٹاؤن میں ہونے والے دھماکے سے قبل آنے والی مشکوک گاڑی کی فوٹیج سامنے آگئی۔
اے آر وائی نیوز کے مطابق دھماکے سے قبل سامنے آنے والی فوٹیج میں دیکھا جاسکتا ہے کہ کالے رنگ کی گاڑی گلی کے کونے پر کھڑی ہے۔
ویڈیو میں نیلے شلوار قمیص میں ملبوس شخص اترتے دیکھا جاسکتا ہے، مشکوک شخص گاڑی میں بیٹھ کر دوبارہ اترتا ہے۔
فوٹیج میں دیکھا جاسکتا ہے کہ متعلقہ شخص گاڑی دھماکے سے آدھا گھنٹے قبل کھڑی کرکے چلا جاتا ہے۔
مزید پڑھیں: جوہرٹاؤن لاہور میں دھماکا کیسے ہوا؟ ابتدائی رپورٹ میں اہم انکشافات
واضح رہے کہ جوہر ٹاؤن میں دھماکے کے نتیجے میں 3 افراد جاں بحق اور 24 افراد زخمی ہوگئے تھے، زخمیوں میں خواتین سمیت دو بچے بھی شامل ہیں۔
وفاقی وزیرداخلہ شیخ رشید احمد نے بھی جوہرٹاؤن لاہور دھماکے کا نوٹس لیتے ہوئے چیف سیکرٹری اور آئی جی پنجاب سے رپورٹ طلب کرلی تھی۔
وزیر داخلہ نے دھماکے سے زخمی ہونے والوں کی جلد صحتیابی کے لئےدعا کرتے ہوئے کہا تھا کہ دھماکے کی نوعیت کاپتہ لگایاجارہاہے، وفاقی ادارےتحقیقات میں پنجاب حکومت کی معاونت کررہے ہیں۔
