راولپنڈی : پاکستان اور سعودی عرب کی مشترکہ تربیتی مشقیں اختتام پذیر ہوگئیں ، مشترکہ تربیتی ’’البتارون ‘‘مشقیں2ہفتےتک جاری رہیں۔
تفصیلات کے مطابق پاک فوج کے شعبۂ تعلقاتِ عامہ (آئی ایس پی آر) کی جانب سے بیان میں کہا گیا ہے کہ پاکستان اور سعودی عرب کی انسداد دہشت گردی سے متعلق مشترکہ تربیتی مشقیں البتار ون اختتام پذیر ہوگئیں۔
چیراٹ میں منعقدہ اختتامی تقریب میں سعودی عرب کے سفیر نواف سعید المالکی اور اعلیٰ عسکری حکام نے شرکت کی اور مشق کے آخری دن کی مختلف ڈرلز کا مشاہدہ کیا۔
دو ہفتے طویل مشقوں کا آغاز 22 اگست کو ہوا، جس میں دونوں ممالک کی اسپیشل فورسز کے دستوں سمیت کامبیٹ ایوی ایشن نے اپنی پیشہ وارانہ مہارت کا مظاہرہ کیا۔
تقریب کا اختتام فلائی پاسٹ کے ساتھ ہوا، اس مشق کا مقصد دونوں برادر ممالک کے درمیان تاریخی فوجی تعلقات کو مزید تقویت دینا تھا، جس میں انسداد دہشت گردی کے خلاف مشترکہ آپریشنز سمیت مستقبل میں فوجی تعاون اور تجربات کا تبادلہ شامل ہیں۔
