کراچی جوڈیشل مجسٹریٹ نے صحافی فرحان ملک کو چار روزہ جسمانی ریمانڈ پر ایف آئی اے کے حوالے کردیا۔
تفصیلات کے مطابق ایف آئی اے کی جانب سے صحافی فرحان ملک کو کراچی میں جوڈیشل مجسٹریٹ شرقی کی عدالت میں پیش کیا گیا، عدالت نے ایف آئی اے کی درخواست پر فرحان ملک کا 4 روزہ جسمانی ریمانڈ دے دیا۔
فرحان ملک کے وکیل نے بتایا کہ ان کے خلاف پہلے سے انکوائریز جاری تھیں، ایف آئی نے سندھ ہائیکورٹ کے حکم کے برعکس کارروائی کر کے فرحان ملک کو گرفتار کیا۔
ایف آئی اے نے صحافی فرحان ملک کو گرفتار کرلیا
واضح رہے کہ گزشتہ روز ایف آئی اے سائبر کرائم ونگ نے صحافی فرحان ملک کو گرفتار کیا تھا، فرحان ملک کیخلاف پیکا ایکٹ کے تحت مقدمہ درج ہے، ایف آئی اے کچھ دنوں سے فرحان ملک اور ان کے سوشل میڈیا پلیٹ فارم رفتار کیخلاف تحقیقات کررہی تھی۔
فرحان ملک کی گرفتاری کے بعد رفتار کے پلیٹ فارم سے کی جانے والی پوسٹ میں بتایا گیا تھا کہ ’گزشتہ روز ایف آئی اے حکام بغیر کسی پیشگی اطلاع کے دفتر آئے اور انہوں نے ہماری ٹیم کو ہراساں کیا جب کہ ان کے پاس دورہ کرنے کی کوئی وضاحت بھی نہیں دی‘۔
بعد ازاں، ایف آئی اے کی ٹیم نے فرحان ملک کو آج دوپہر ایک بجے اپنے دفتر طلب کیا جس پر فرحان ملک آج ایف آئی اے کے دفتر پہنچے، جہاں انہیں گھنٹوں انتظار کروانے کے بعد شام 6 بجے حراست میں لے لیا گیا۔
