جہلم : نجی ٹی وی کے نمائندہ امتیاز بیگ قاتلانہ حملے میں جاں بحق ہوگئے، نامعلوم افراد نے ان پر ڈنڈوں سے حملہ کیا اور فرارہوگئے۔
تفصیلات کے مطابق جہلم میں نجی ٹی وی کے نمائندہ امتیاز بیگ پر نامعلوم افراد نے حملہ کردیا ، حملے میں امتیاز بیگ جاں بحق ہوگئے۔
پولیس نے تصدیق کی کہ سماء ٹی وی کے رپورٹر امتیاز بیگ کو قتل کیا گیا، نامعلوم افراد نے ان پر اس وقت لاٹھیوں سے حملہ کیا جب وہ نماز کی ادائیگی کے بعد مقامی مسجد سے باہر نکلے۔
پولیس نے بتایا کہ حملہ آور ٹی وی رپورٹر پر حملہ کرنے کے بعد جائے وقوعہ سے فرار ہوگئے۔
مقامی میڈیا رپورٹس میں بتایا گیا کہ سینئر صحافی کی لاش کو ڈسٹرکٹ ہسپتال منتقل کر دیا گیا ہے اور پولیس حکام نے حملے کے محرکات جاننے کے لیے تفتیش شروع کر دی۔
یاد رہے اکتوبر 2021 میں کراچی کی سرحد سے متصل صوبہ بلوچستان کے شہر حب میں کریکر حملے میں ایک صحافی شدید زخمی ہونے کے بعد جان کی بازی ہار گیا تھا۔
حب کے علاقے میں نامعلوم افراد نے ایک گاڑی پر دستی بم پھینکا جس کے نتیجے میں ایک مقامی ٹیلی ویژن صحافی سمیت دو افراد زخمی ہوگئے۔ بعد ازاں وہ طبی امداد کے لیے کراچی کے مقامی اسپتال منتقل کرتے ہوئے دم توڑ گیا تھا، مقتول کی شناخت شاہد زہری کے نام سے ہوئی۔
