اسلام آباد: سندھ، پنجاب اور بلوچستان کے 3 ججز کا اسلام آباد ہائیکورٹ تبادلہ کر کے وزارت قانون نے نوٹیفکیشن جاری کر دیا۔
نوٹیفکیشن کے مطابق لاہور ہائیکورٹ کے جج جسٹس سرفراز ڈوگر، سندھ ہائیکورٹ کے جج جسٹس خادم حسین سومرو اور جسٹس محمد آصف کا بلوچستان ہائیکورٹ سے اسلام آباد ہائیکورٹ تبادلہ کر دیا گیا۔
جسٹس سرفراز ڈوگر کو اسلام آباد ہائیکورٹ کا چیف جسٹس بنائے جانے کا امکان ہے جبکہ اسلام آباد ہائیکورٹ کے چیف جسٹس عامر فاروق کا سپریم کورٹ ایلیویٹ ہونے کا امکان ہے۔
صدر مملکت آصف علی زرداری نے آئین کے آرٹیکل 200 کے تحت ججز کو اسلام آباد ہائیکورٹ ٹرانسفر کیا۔
گزشتہ روز اسلام آباد ہائیکورٹ کے ججز نے دوسرے صوبوں سے ججز کے تبادلے پر صدر مملکت آصف علی زرداری کو خط لکھا تھا جس میں کہا گیا کہ دوسری ہائیکورٹ سے اسلام آباد ہائیکورٹ میں چیف جسٹس نہ لایا جائے، اسلام آباد ہائیکورٹ سے ہی 3 سینئر ججز میں سے چیف جسٹس بنایا جائے۔
سندھ ہائیکورٹ، لاہور ہائیکورٹ اور اسلام آباد ہائیکورٹ کے چیف جسٹس کو بھی خط کی کاپی بھجوا دی گئی تھی۔
عدالتی ذرائع کا کہنا تھا کہ اسلام آباد ہائیکورٹ کے جسٹس محسن اختر کیانی سمیت مختلف ججز نے خط لکھا، اسلام آباد ہائیکورٹ کی جانب سے جاری سنیارٹی لسٹ کیسے تبدیل ہو سکتی ہے؟
