اسلام آباد : جمیعت علما اسلام ف (جے یو آئی) نے بھی متنازع پیکا ایکٹ بل پر تحفظات کا اظہار کردیا اور کہا حکومت جو بھی مثبت کام کرے پی ٹی آئی نہیں تو کم از کم ہمیں اعتماد میں لے۔
تفصیلات کے مطابق جمیعت علما اسلام ف (جے یو آئی) رکن قومی اسمبلی شاہدہ اختر علی نے پارلیمنٹ ہاؤس کے باہر گفتگو کرتے ہوئے کہا کہ حکومت نے متنازع پیکا ایکٹ بل پر جے یوآئی کو اعتماد میں نہیں لیا، قانون سازی کا ایک طریقہ کار ہوتا ہے۔
شاہدہ اختر علی کا کہنا تھا کہ اجلاس سے قبل ایڈوائزری کمیٹی میں مشاورت ہوتی ہے، آج جس طرح سپلمنٹری ایجنڈا آیا ہمیں اعتمادمیں نہیں لیا گیا۔
انھوں نے کہا کہ اپوزیشن کی کوئی مثبت ترمیم آتی ہے تو حکومت اسکی بھی مخالفت کرتی ہے، پارلیمنٹ کواس کااختیار نہیں دیاجارہا،اس کے مثبت نتائج نہیں ہوں گے۔
شاہدہ اختر نے مزید کہا کہ اس طرح کےاقدامات سےحکومت اپوزیشن میں دوریاں پیدا ہوتی ہیں، حکومت جوبھی مثبت کام کرے پی ٹی آئی نہیں تو کم از کم ہمیں اعتماد میں لے۔
