بالی ووڈ کے مسٹر پرفیکشنسٹ عامر خان نے اپنی ذمہ دار سے متعلق بڑا فیصلہ کرلیا ہے۔
حال ہی میں بالی ووڈ انڈسٹری میں ڈیبیو کرنے والے اداکار جنید خان نے اپنے حالیہ انٹرویو میں اپنے والد کی ریٹائرمنٹ سے متعلق گفتگو کی ہے۔
انٹرویو کے دوران جب جنید خان سے کیریئر کے ابتدائی دنوں میں ہی پروڈکشن کے کام میں جانے سے متعلق سوال کیا گیا تو انہوں نے جواب دیا کہ ’’جی یہ میرا فیصلہ ہے، میں فلم سیٹ پر رہا ہوں اور فلم ’پی کے‘ کے سیٹ پر کیمرے کے پیچھے موجود تھا‘‘۔
جنید خان کا کہنا تھا کہ فلم مہاراج کی شوٹنگ مکمل ہونے کے بعد عامر خان پروڈکشن کی جانب سے ہم ایک فلم کے لیے کام کر رہے تھے، اس دوران انہوں نے مجھ سے اس بات کا اظہار بھی کیا۔
اداکار جنید خان کا کہنا تھا کہ انہوں (عامر خان) نے مجھ سے کہا کہ ’میں ریٹائر ہو رہا ہوں، کیوں نہ تم یہ سب سنبھالو۔‘ لہٰذا یہ وہ لمحہ تھا جب میں نے پروڈکشن میں آنے کا فیصلہ کیا۔
اداکار جنید خان نے کہا کہ میرا خیال ہے کہ مجھے پروڈکشن کے بارے میں اچھی معلومات ہیں، لیکن یہ فلم سازی میں مشکل ترین کاموں میں سے ایک ہے۔
خیال رہے کہ جنید خان اس وقت عامر خان پروڈکشنز کےلیے فلم ’پریتم پیارے‘ پروڈیوس کر رہے ہیں۔
