کراچی : اے آر وائی ڈیجیٹل کی نئی ڈرامہ سیریل ’تم بن کیسے جئیں‘ کے مرکزی کردار جنید جمشید نیازی کا کہنا ہے کہ میں نے بالکل صحیح وقت پر شادی کی۔
اے آر وائی ڈیجیٹل کے پروگرام گڈ مارننگ پاکستان میں ڈرامہ سیریل ’تم بن کیسے جئیں‘ کے تین مرکزی کرداروں نے شرکت کی۔
جن میں ثانیہ شمشاد، حماد شعیب اور جنید جمشید نیازی شامل تھے اس موقع پر ناظرین نے ٹیلی فون پر مہمانوں بہت سے سوالات کیے جس کے انہوں نے دلچسپ جوابات دیئے۔
ایک کالر نے ڈرامے کے ہیرو اداکار جنید جمشید نیازی سے ان کی شادی سے متعلق سوال کیا کہ آپ کے مداحوں کی تعداد بہت زیادہ ہے لیکن آپ نے شادی جلدی کیوں کی؟
جس کے جواب میں جنید جمشید نیازی نے کہا کہ شادی اپنے وقت پر کر لینی چاہیے اس کیلئے 25 یا 26 سال مناسب عمر ہے، میں نے بھی ٹھیک وقت پر شادی کی۔
ان کا کہنا تھا کہ میں نوجوانوں کو بھی یہی کہوں گا کہ اس بارے میں زیادہ نہ سوچیں وقت پر شادی کرلیں کیونکہ آنے والی اپنا نصیب خود لے کر آتی ہے۔
یاد رہے کہ اے آر وائی ڈیجیٹل کے نئے ڈرامہ سیریل ’تم بن کیسے جئیں‘ کے ٹیزر نے دھوم مچادی ہے۔
اے آر وائی ڈیجیٹل اپنے ناظرین کے لیے ایک اور شاندار ڈرامہ سیریل ’تم بن کیسے جئیں‘ لے کر آرہا ہے جس کی مرکزی کاسٹ میں جنید جمشید نیازی، ثانیہ شمشاد اور حماد شعیب اداکاری کے جوہر دکھائیں گے۔
ڈرامے کی ہدایت کاری کے فرائض ثاقب ظفر خان نے انجام دیے ہیں جبکہ اس کی کہانی ایڈیسن ادریس مسیح نے لکھی ہے۔
ٹیزر کو یوٹیوب پر لاکھوں کی تعداد میں مداح دیکھ چکے ہیں اور جنید جمشید نیازی کے ساتھ ثانیہ شمشاد کی جوڑی کو پسند بھی کررہے ہیں۔
واضح رہے کہ اس سے قبل جنید جمشید نیازی نے بلاک بسٹر ڈرامہ سیریل ’بے بی باجی‘ میں اداکاری کے جوہر دکھائے تھے جس میں ان کے کردار کو مداحوں نے پسند کیا تھا۔
