کے۔ الیکٹرک کی بجلی چوروں کے خلاف کارروائیوں میں تیزی، رواں سال 14,000 سے زائد کارروائیاں کی گئیں
کراچی : بجلی کی چوری اور بلوں کی عدم ادائیگی صارفین کو بلاتعطل بجلی کی فراہمی میں بڑی رکاوٹ ہے۔ اس ملک گیر مسئلے سے نمٹنے کے لیے پُرعزم کے۔ الیکٹرک نے بجلی چوروں اور نادہندگان کے خلاف کارروائیاں تیز کردی ہیں۔
رواں سال پاور یوٹیلیٹی نے مجموعی طور پر 14ہزار سے زائد کارروائیاں کیں جو ماہانہ اوسطاً 1800کارروائیاں بنتی ہیں۔ ان کارروائیوں کے دوران 94ہزار غیرقانونی ہک کنکشنز (کنڈے) ہٹائے گئے، جن کا مجموعی وزن تقریباً 130ٹن ہے۔
کے۔ الیکٹرک کی متعدد ٹیمیں بجلی چوری کے خلاف مہم چلاتی ہیں اور شہر بھر میں غیرقانونی طور پر بجلی تک رسائی کے لیے استعمال ہونی والی تاروں کے جال کو ختم کرنے کے لیے چوبیس گھنٹے کام کرتی ہیں۔
رواں سال جن علاقوں میں بجلی کی چوری کے خلاف مہم چلائی گئیں ان میں بلدیہ، بن قاسم، ڈیفنس، گلشن، گلستان جوہر، کورنگی، اورنگی، سوسائٹی، سرجانی اور اوتھل شامل ہیں۔
جنوری 2023 سے اب تک سب سے زیادہ 3,400 کارروائیاں بن قاسم میں کی گئیں اور اس علاقے سے 16,300 غیرقانونی کنڈے ہٹائے گئے جن کا وزن 21,000 کلو گرام ہے۔ تاہم سب سے زیادہ کنڈے کورنگی سے ہٹائے گئے جن کی تعداد 17,500 ہے۔
مزید برآں ڈیفنس کے علاقے میں تقریباً 50 کارروائیاں کی گئیں، یہ غیرقانونی کنڈے نہ صرف بجلی کے انفرا اسٹرکچر کو نقصان پہنچاتے ہیں بلکہ عوام کی جان و مال کو بھی خطرے میں ڈالتے ہیں۔
ڈائریکٹر کمیونی کیشنز کے۔ الیکٹرک عمران رانا کا کہنا ہے کہ بجلی کی چوری نہ صرف کراچی بلکہ پورے ملک کا ایک اہم مسئلہ ہے، جس کے باعث 589 ارب روپے کا نقصان ہوتا ہے، جو پاور سیکٹر کے بڑھتے ہوئے گردشی قرضوں کا ایک اہم سبب ہے۔
جن علاقوں میں بجلی کی چوری اور بلوں کی عدم ادائیگی زیادہ ہے وہاں بجلی کی مستقل فراہمی ممکن نہیں۔ اس لیے بجلی کی چوری کو جرم قرار دینا بہت ضروری ہے۔ جہاں چوری میں کمی آتی ہے وہاں بجلی کی فراہمی میں بھی بہتری آتی ہے۔
پاکستان پینل کوڈ ترمیمی ایکٹ قومی اسمبلی سے منظور ہوچکا ہے اور اب سرکاری نوٹیفکیشن کا انتظار ہے۔ توقع ہے کہ یہ اہم قانون سازی پاکستان میں بجلی کی چوری روکنے میں اہم کردار ادا کرے گی۔ ہم بجلی چوروں کو سزا دینے اور ان سے واجبات وصول کرنے کے حکومتی موقف کی حمایت کرتے ہیں۔
ہم قانون نافذ کرنے والے اداروں اور شہری انتظامیہ کی جانب بجلی کی چوری روکنے میں تعاون پر اُن کے شکرگزار ہیں کہ وہ اس لعنت کو روکنے میں مکمل تعاون کررہے ہیں۔ ہم پاور سیکٹر کو درپیش چیلنجز سے بھی پوری طرح آگاہ ہیں اور حکومت کو ایسی معلومات فراہم کرنا چاہتے ہیں جس سے پاکستان کو درپیش اس اہم مسئلے سے نمٹنے میں مدد ملے گی۔
موجودہ حالات میں بجلی کے بلوں کے حوالے سے بے چینی بڑھ رہی ہے اور کے۔ الیکٹرک کی ٹیموں کو اپنے فرائض کی انجام دہی میں رکاوٹوں کا سامنا ہے۔ کے۔ الیکٹرک کمیونیٹیز کی خدمت کرنے اور بلاتعطل بجلی کی فراہمی یقینی کی کوشش کرنے والی اپنی ٹیموں سے تعاون کے لیے متعلقہ حکام سے مسلسل رابطے میں ہے۔
