چکوال: کلر کہار سالٹ رینج کے قریب بس حادثے میں جاں بحق ایک ہی خاندان کے 14 افراد کی نماز جنارہ ادا کردی گئی۔
تفصیلات کے مطابق چکوال میں کلر کہار سالٹ رینج کے قریب بس حادثے میں جاں بحق افراد ایک ہی خاندان کے چودہ افراد کی نمازہ جنازہ دربار شاہ جیوانہ جھنگ میں ادا کر دی گئی۔
نماز جنازہ میں سابق ایم پی اے رائے تیمور بھٹی، سماجی شخصیات اور اہل علاقہ نے بڑی تعداد میں شرکت کی۔
دربار شاہ جیوانہ کے گدی نشین اور سابق وزیر داخلہ مخدوم فیصل صالح حیات نے بیرون ملک سے اپنے پیغام میں سوگوار خاندان سے اظہار تعزیت کیا۔
مخدوم فیصل صالح حیات نے کہا کہ دکھ کی اس گھڑی میں وہ انکے ساتھ برابر کے شریک ہیں۔
نماز جنازہ کے بعد اہل علاقہ نے اشکبار آنکھوں کے ساتھ جاں بحق افراد کی تدفین آبائی قبرستان میں کردی۔
یاد رہے چکوال میں کلرکہار کے قریب بس کو حادثہ پیش آیا تھا، جس کے نتیجے میں 14 باراتی زندگی کی بازی ہار گئے تھے جبکہ حادثے میں تریسٹھ افراد زخمی ہوئے تھے۔
بدقسمت بس سالٹ رینج کے مقام پر بریک فیل ہوجانے کے باعث بے قابو ہوگئی تھی اور حفاظتی رکاوٹیں توڑتی ہوئی دوسری جانب جاگری تھی۔
