کمال امروہی کو ہندوستانی سنیما کا ایک باکمال ہدایت کار، کہانی نویس، ادیب اور شاعر بھی کہا جاتا ہے۔ انھوں نے سنیما کے لیے جو کام کیا، وہ بڑے پردے کا خوب صورت اور لازوال نقش ثابت ہوا۔ فلم انڈسٹری میں تخلیقی صلاحیتوں اور کام کے ساتھ کمال امروہوی کے عاشق مزاج اور حُسن پرست ہونے کا بھی چرچا رہا۔
کمال امروہی اور مشہور اداکارہ مدھو بالا کے درمیان ملاقات سے متعلق ایک واقعہ انیس امروہی کے قلم سے یوں بیان کیا جاتا ہے کہ ایک بار ایک دوست نے کمال امروہی کو کھانے پر مدعو کیا جہاں ممتاز نام کی ایک خوب صورت لڑکی سے اُن کی ملاقات ہوئی۔ کھانے کی میز پر وہ لڑکی کمال امروہی کے بالکل سامنے بیٹھی تھی۔
جب وہ کسی کام سے میز سے اُٹھ کر گئی تو کمال صاحب نے اپنے دوست سے دریافت کیا کہ کیا یہ لڑکی فلموں میں کام کرنا چاہتی ہے؟
اُن دنوں کمال صاحب کو فلم ’محل‘ کے لیے ہیروئن کی تلاش تھی۔ دوست نے بتایا کہ ممتاز کئی فلموں میں کام کر چکی ہے اور اس دعوت کا مقصد بھی یہی تھا کہ ممتاز (مدھو بالا کا اصلی نام) کو آپ سے ملوایا جائے۔ اس طرح چھوٹی فلموں کی اداکارہ ممتاز بڑی فلم ’محل‘ کی ہیروئن مدھوبالا بن گئی۔
اس میں کوئی شک نہیں کہ فلم ’محل‘ میں مدھوبالا بے حد خوب صورت دکھائی دی ہے اور اعلیٰ درجے کی فلموں میں وہ اسی فلم سے اپنی پہچان بنا سکی۔
