قومی ٹیم کے سابق وکٹ کیپر بیٹر کامران اکمل اور باسط علی نے اسپنر ابرار احمد کے حق میں آواز بلند کردی۔
اے آر وائی نیوز کے پروگرام ’اسپورٹس روم‘ میں گفتگو کرتے ہوئے سابق وکٹ کیپر بیٹر کامران اکمل نے کہا کہ مجھے سمجھ نہیں آرہی یہ ابرار احمد کو ساتھ لے کر کس لیے گئے ہیں آپ کا ایک لڑکا (شاداب خان) فارم میں نہیں ہے، وہ اچھا کرکٹر ہے میچ ونر ہے لیکن ابھی وہ فارم میں نہیں ہے تو جسے ساتھ لے کر گئے ہیں اسے ضرور کھلائیں۔
انہوں نے کہا کہ آپ نے ویست انڈیز میں بھی میچز کھیلنے ہیں وہاں اسپنرز کو مدد ملے گی، ابرار احمد کو کھلا کر اعتماد دینا ضروری ہے۔
کامران اکمل نے کہا کہ مجھے نہیں معلوم امریکا کے خلاف میچ میں پلیئنگ الیون کیا ہوگی لیکن میری نظر میں عماد وسیم انجرڈ ہے تو ابرار احمد کو آج ضرور کھیلنا چاہیے، شاداب خان کو ویٹنگ لسٹ میں ڈالیں جب ضرورت پڑے گی تو آگے کے میچز میں انہیں شامل کرلیں۔
دوسری جانب باسط علی نے کہا کہ امریکا اور ویسٹ انڈیز میں اوپن گراؤنڈ ہیں، وہاں پر ایسا بولر چاہیے جو ہوا میں تیز گیند کرتا ہو جو فلائٹ نہ کرتا ہو، ایسے بولر کی ضرورت ہے جو 90 کی اسپیڈ سے گیند کرے۔
انہوں نے کہا کہ ٹیم مینجمنٹ کو یہ سوچنا چاہیے کہ ابرار احمد ان کنڈیشن پر سودمند ثابت ہوسکتا ہے، اگر آپ شاداب خان کو بیٹنگ کی وجہ سے کھلانا چاہ رہے ہیں تو یہ آپ کی منفی سوچ ہے۔
