کراچی: کامران ٹیسوری نے عوام کی شکایات کے لیے گورنر ہاؤس کے باہر گھنٹی لٹکا کر مغل بادشاہ جہانگیر کی یاد تازہ کر دی جنھوں نے سترہ ویں صدی میں محل کے باہر انصاف کی گھنٹی نصب کی تھی۔
تفصیلات کے مطابق گورنر سندھ کامران ٹیسوری نے ایک اور وعدہ پورا کر دیا، گورنر ہاؤس کے باہر اپنی شکایات اور مسائل لے کر آنے والوں کے لیے گیٹ پر اطلاعی گھنٹی نصب کر دی۔
یہ گھنٹی ہنگامی صورت حال کے لیے ہے اور اس کا وقت رات 12 بجے سے صبح 8 بجے تک ہوگا۔ کامرا ن خان ٹیسوری نے کہا کہ اس کا باضابطہ افتتاح بدھ، 10 مئی کو 3 بجے میڈیا کے سامنے ہوگا۔
واضح رہے کہ گزشتہ روز تحریک انصاف کے رکن اسمبلی فہیم خان نے گورنر ہاؤس کے باہر غلط ویڈیو بنا کر گھنٹی نہ لگنے کا غلط پروپیگنڈہ کیا تھا۔
گورنر سندھ نے اس حوالے سے کہا کہ اپنے آپ کو ’عوامی نمائندہ‘ کہنے والے گورنر ہاؤس کے باہر نصب گھنٹی کے بارے میں عوام کو گمراہ کر رہے ہیں، انھوں نے کہا ’’اصل میں انھیں گورنر ہاؤس عوام کے لیے کھولا جانا ہضم نہیں ہو رہا، کیوں کہ یہ ان کے لیڈر کا وعدہ تھا جو میں نے پورا کر دیا۔‘‘
