ممبئی: بھارتی گلوکارہ کانیکا کپور کا کرونا ٹیسٹ ایک بار پھر پازیٹیو آگیا جس کے بعد وہ خود ہی قرنطینہ میں چلی گئیں۔
بھارتی میڈیا رپورٹ کے مطابق بالی ووڈ کے مشہور گانے گانے والی گلوکارہ حال ہی میں امریکا سے بھارت واپس پہنچیں تھیں، انہیں وطن واپسی کے بعد کرونا کی علامات ظاہر بھی ہوئیں مگر انہوں نے اسے نظر انداز کیا اور لوگوں سے میل جول رکھا۔
کانیکا نے ایک تقریب میں شرکت کی تھی جس میں تین سو سے زائد اعلیٰ شخصیات شریک تھیں جن میں ججز، اراکین اسمبلی شامل تھے۔
مزید پڑھیں: کرونا وائرس : بے بی ڈول سنگر کانیکا کپور کے خلاف تین مقدمات درج
کرونا وائرس کے ٹیسٹ کی رپورٹ آنے کے بعد پولیس نے گلوکارہ کے خلاف مقدمہ درج کیا جس کے بعد اُن کا دوبارہ ٹیسٹ کیا گیا۔
میڈیا رپورٹ کے مطابق کانیکا کپور کے کرونا ٹیسٹ کی رپورٹ ایک بار پھر پازیٹیو آئی ہے جس کے بعد پولیس اب اُن لوگوں کی تلاش میں ہے جن سے اداکارہ نے پارٹیوں میں ملاقات کی۔
محکمہ صحت کے مطابق کانیکا سے رابطے میں رہنے والے تمام لوگوں کا کرونا ٹیسٹ کرونا ناگزیر ہے کیونکہ اگر کسی ایک کو بھی وائرس منتقل ہوگیا تو یہ بڑی تباہی کا سبب بن سکتا ہے۔
یہ بھی پڑھیں: کرونا وائرس کی شکار بھارتی گلوکارہ نے 300 لوگوں کی زندگی خطرے میں ڈال دی
یاد رہے کہ چند روز قبل بھارتی گلوکارہ نے کرونا کی تشخیص کی تصدیق کرتے ہوئے سماجی رابطے کی ویب سائٹ پر ایک پوسٹ کی تھی جس میں انہوں نے لکھا تھا کہ ’مجھے نزلہ زکام کی شکایت تھی جس کے بعد میں نے کرونا کا ٹیسٹ کروایا اور اس کی رپورٹ مثبت آئی‘۔ انہوں نے لکھا تھا کہ ’اب میں اور میرے تمام گھر والے قرنطینہ میں چلے گئے ہیں۔