The news is by your side.

Advertisement

کپل دیو اور سنیل گواسکر بھارتی ٹیم پر برس پڑے

نئی دہلی: سابق بھارتی کپتان کپل دیو اور سنیل گواسکر ٹی 20 ورلڈ کپ میں بھارتی کرکٹ ٹیم کی ناقص کارکردگی پر برس پڑے۔

بھارتی میڈیا کے مطابق سابق کپتان کپل دیو نے کہا کہ بھارتی ٹیم کی ہار سے کرکٹ ختم نہیں ہوگئی، آئی پی ایل اور ورلڈ کپ کے درمیان فاصلہ رکھنا ہوگا تاکہ کھلاڑیوں کی کارکردگی متاثر نہ ہو۔

انہوں نے کہا کہ جب کھلاڑی آئی پی ایل کو ورلڈ کپ پر ترجیح دیں گے تو پھر ہم کیا کہہ سکتے ہیں، ہر کھلاڑی کو پہلے ملک سے کھیلنے کو ترجیح دینی چاہیے۔

کپل دیو نے کہا کہ بی سی سی آئی کو بھی مستقبل میں آئی سی سی ایونٹ سے قبل پلاننگ کرنی ہوگی، ہمیں ہار سے سیکھنا ہوگا کہ جو غلطیاں ہوئی ہیں انہیں دوبارہ نہ دہرایا جائے۔

کپل دیو نے کہا کہ میں کھلاڑیوں کے مالی معاملات نہیں جانتا اس لیے اس پر زیادہ بات نہیں کروں گا۔

دوسری جانب سنیل گواسکر نے کہا کہ موجودہ بھارتی ٹیم کسی بھی اچھی ٹیم کے خلاف اسکور نہیں کرسکتی۔

سنیل گواسکر نے بھارتی کرکٹ ٹیم کی ناقص کارکردگی پر تبصرہ کرتے ہوئے کہا کہ ایک ٹیم میں بہت زیادہ تبدیلیاں کرنا درست نہیں ہے کیونکہ ایسا نہیں ہے کہ بھارت اپنے تمام میچ ہار گیا بلکہ دو میچوں میں بلے باز وہ نہیں کرسکے جس کی ان سے توقع کی جارہی تھی اور یہی وجہ ہے کہ بھارتی کرکٹ ٹیم ایسی حالت میں ہے۔

اُنہوں نے کہا کہ بھارت کے پاس ایسے کھلاڑی ہونے چاہئیں جو فیلڈنگ میں غیرمعمولی ہوں، نیوزی لینڈ نے جس طرح فیلڈنگ کی، رنز بچائے، کیچز لیے، وہ سب سے اچھا تھا۔

اُن کا مزید کہنا تھا کہ اگر آپ بھارتی ٹیم کو دیکھیں، سوائے 3 سے 4 شاندار فیلڈرز کے کوئی ایسا فیلڈر نہیں جو رنز اور باؤنڈریز روکے۔

خیال رہے کہ نیوزی لینڈ نے گروپ میچ میں افغانستان کو شکست دے کر اس کے ساتھ ساتھ بھارت کو بھی ٹی ٹوئنٹی ورلڈکپ سے باہر کردیا، اپنی جیت کے ساتھ نیوزی لینڈ سیمی فائنل میں پہنچ گیا جبکہ بھارت سیمی فائنل کی دوڑ سے باہر ہوگیا۔

Comments

یہ بھی پڑھیں