کراچی: رینجرز اور پولیس نے ہائی پر وفائل ڈکیتی کی متعدد وارداتوں میں ملوث 2 ملزمان کو گرفتار کرلیا۔
تفصیلات کے مطابق رینجرز اورپولیس نے انٹیلی جنس معلومات پر اورنگی ٹاؤن میں مشترکہ کارروائی کرتے ہوئے ہائی پر وفائل ڈکیتی کی متعدد وارداتوں میں ملوث 2 ملزمان کو گرفتار کرلیا ہے۔
ترجمان رینجرز کا بتانا ہے کہ ملزمان احسان اللہ عرف جھوٹا اور ظاہر شاہ عرف ظہیر سے موبائل فونز اور موٹر سائیکل برآمد ہوا ہے، ملزمان 2 ساتھیوں کے ہمراہ سائٹ ایریا سے پیٹرول پمپ سے 80 لاکھ چھین کر فرار ہوئے تھے۔
ترجمان کا کہنا تھا کہ پیٹرول پمپ پر ڈکیتی کا واقعہ 2 دن قبل ہوا تھا جس کی فوٹیج سوشل میڈیا پربھی وائرل ہوئی، واقعےکی ایف آئی آر تھانہ سائٹ اے میں درج ہے۔
ترجمان رینجرز نے بتایا کہ ملزمان نے اورنگی ٹاؤن، سائٹ ٹاؤن، گلبرگ، گڈاپ میں ڈکیتی اور اسنیچنگ کی، ملزمان نے 150 سے زائد وارداتوں میں 400 سے زائد موبائل فون چھینے۔
ترجمان نے مزید بتایا کہ ملزمان نے 50 سے زائد موٹر سائیکل اور 3 کروڑ سے زائد نقدی لوٹنے کا اعتراف کیا، ملزمان کے دیگر ساتھیوں کی گرفتاری کے لیے چھاپے مارے جا رہے ہیں۔
