کراچی میں رات گئے 2 مبینہ پولیس مقابلے ہوئے جن میں 4 ڈاکوؤں کو زخمی حالت میں گرفتار کرلیا گیا ہے۔
تفصیلات کے مطابق کورنگی نمبر ڈھائی کے مقام پر زمان ٹاؤن پولیس کا ڈاکوؤں سے مبینہ مقابلہ ہوا، پولیس نے بتایا کہ فائرنگ کے تبادلے میں 2 ڈاکوؤں کو زخمی حالت میں گرفتار کیا گیا۔ ڈاکوؤں سے اسلحہ، 4 موبائل فون اور موٹرسائیکل برآمد ہوا۔
پولیس نے کہا کہ ڈاکو کورنگی کوسٹ گارڈ چورنگی کے قریب شہری سے لوٹ مارکررہے تھے۔ پیٹرولنگ پولیس پارٹی کو دیکھ کر ڈاکوؤں نے فائرنگ کردی۔
پولیس نے جوابی فائرنگ کے بعد دونوں ڈاکوؤں کو زخمی حالت میں گرفتار کرلیا۔ ڈاکوؤں کی شناخت حریرہ اور طارق کے نام سےہوئی جنھیں طبی امداد کیلئے جناح اسپتال منتقل کردیا گیا ہے۔
دریں اثنا ڈیفنس فیز 8 خیابان جامی کے قریب بھی مبینہ پولیس مقابلہ ہوا جس میں فائرنگ کے تبادلے میں ایک اہلکار زخمی ہوا۔
پولیس نے بتایا کہ 2 ڈاکوؤں کو زخمی حالت میں گرفتار کرلیا گیا ہے جبکہ ملزمان سے اسلحہ، لوٹا ہوا سامان اور موٹرسائیکل برآمد ہوئی۔ زخمی ڈاکوؤں کی شناخت ریحان اور شاہد کے ناموں سے ہوئی۔
