The news is by your side.

Advertisement

کراچی: لیاری میں 2 منزلہ رہائشی عمارت گرگئی، 2 افراد جاں بحق

کراچی: شہر قائد کے علاقے لیاری میں 2 منزلہ رہائشی عمارت گرنے کے نتیجے میں 2 افراد جاں بحق جبکہ متعدد افراد زخمی ہوگئے۔

تفصیلات کے مطابق کراچی میں لیاری کوئلہ گودام کے قریب 2 منزلہ رہائشی عمارت گر گئی، حادثے میں 2 افراد جان کی بازی ہار گئے جبکہ 10 زخمیوں کو عمارت کے ملبے سے نکال کر سول اسپتال منتقل کر دیا گیا۔

ریسکیو ذرائع کا کہنا ہے کہ متعدد افراد ملبے تلے دبے ہوئے ہیں۔جائے حادثہ سے ملبہ ہٹانے کا کام بدستور جاری ہے۔

ریسکیو حکام کا کہنا ہے کہ جاں بحق 2 افراد میں سے ایک کی شناخت جان محمد کے نام سے ہوگئی، دوسرےشخص کی شناخت تاحال نہ ہوسکی۔

ذرائع کے مطابق زخمیوں میں 30 سالہ عبدالرحمان، 25 سالہ داؤد، 45 سالہ حبیب، 30 سالہ عمیر خان ، 40 سالہ شیر خان ،25 سالہ سمیع اللہ،18 سالہ ریاض ، 25 سالہ حبیب سعید اور 20 سالہ عمر خان شامل ہے۔

گورنر سندھ عمران اسماعیل نے لیاری میں رہائشی عمارت گرنے کا نوٹس لیتے ہوئے چیف سیکریٹری سندھ سے رپورٹ طلب کرلی۔انہوں نے کہا کہ ایس بی سی اے کی نا اہلی سے شہریوں کی جانیں محفوظ نہیں ہیں۔

کراچی: 4منزلہ رہائشی عمارت گرگئی، ملبے سے 7افراد کی لاشیں نکال لی گئی

اس سے قبل 10 ستمبر کو کورنگی کے علاقے اللہ والا ٹاؤن میں رہائشی عمارت زمین بوس ہوگئی تھی جس کے ملبے سے 7 افراد کی لاشیں نکال لی گئی تھیں۔

عمارت گرنے کے بعد علاقہ مکینوں نے فوری طور پر اپنی مدد آپ کے تحت ریسکیو کارروائیاں شروع کیں تاہم بعدازاں ریسکیو ٹیموں کے رضا کار بھی جائے وقوعہ پر پہنچے جس کے بعد عمارت کے ملبے تلے دبے افراد کو نکالا گیا۔

Comments

یہ بھی پڑھیں