کراچی : کراچی ایئرپورٹ پر لوہے کے پرزوں میں چھپا کر منشیات اسمگلنگ کی کوشش ناکام بنادی گئی اور مسافر سےکروڑوں روپےمالیت کی آئس برآمد کرلی۔
تفصیلات کے مطابق پاکستان کسٹم نے جناح انٹرنیشنل ائیرپورٹ پر کارروائی میں منشیات کی اسمگلنگ کی کوشش ناکام بنادی اور مسافر کو گرفتار کرلیا۔
حکام نے بتایا کہ مسافر کے بیگ سے 5.5 کلوگرام میتھ ایمفیٹامائن (آئس) برآمد ہوئی ، جس کی مالیت تقریباً 4 کروڑ 60 لاکھ روپے ہے۔
حکام کا کہنا تھا کہ مسافر شرافت امانت مسیح پروازای کے607 کے ذریعے دبئی اورای کے837 کے ذریعے بحرین جا رہا تھا۔
حکام نے مسافر کے انٹرویو کے دوران مشکوک جوابات اور بیان میں تضادات کے بعد سامان کی مکمل تلاشی لی تو تلاشی کے دوران بیگ میں موجود گیس شاک ابزاربرز (Gas Shock Absorbers) غیرمعمولی طور پر بھاری اور تبدیل شدہ پائے گئے۔
حکام نے کہا کہ بیگ میں موجود گیس شاک ابزاربرز کو جب توڑا گیا تو ان کے اندر انتہائی مہارت سے چھپائی گئی میتھ ایمفیٹامائن برآمد ہوئی تاہم ملزم سے تفتیش جاری ہے۔
