16 اکتوبر کو ہونے والے ضمنی الیکشن میں کراچی سے این اے 237 کے پولنگ اسٹیشن 129 پر پی ٹی آئی اور پی پی کارکنوں میں جھگڑے کی ویڈیو سامنے آگئی ہے۔
اے آر وائی نیوز کو حاصل ہونے والی ویڈیو میں واضح دیکھا جاسکتا ہے کے پیپلز پارٹی ارکان اسمبلی نے جھگڑے کا آغاز کیا۔
ویڈیو میں دیکھا جا سکتا ہے کہ پی ٹی آئی کے بلال غفار پولنگ اسٹیشن کے باہر پر امن طریقے سے بات چیت کر رہے تھے اور انہوں نے اپنے کارکنان کو پیچھے ہٹنے کی ہدایات دیں۔
ویڈیو کے مطابق کئی بڑی گاڑیاں پولیس پروٹوکول میں آکر سامنے رکیں جس میں سے پی پی ایم پی اے سلیم بلوچ اور وزیراعلیٰ کے مشیر سلمان مراد اترے اور جارحانہ انداز میں تحریک انصاف کے کارکنان کی جانب بڑھے۔
ایم پی اے سلیم بلوچ نے سب سے پہلے پی ٹی آئی کارکنان کو تھپڑ مارے، پھر ایم پی اے اور جیالوں نے بلال غفار اور پی ٹی آئی کارکنوں کر ہلہ بول دیا۔
اس جھگڑے کے دوران پی ٹی آئی کراچی کے صدر بلال غفار اور کارکنان شدید زخمی ہوئے، ویڈیو میں بلال غفار کو زخمی حالت میں دیکھا جا سکتا ہے اور ان کے ساتھی سر پر پانی ڈال کر خون صاف کرتے نظر آ رہے ہیں۔
ویڈیو میں یہ بھی دیکھا جاسکتا ہے کہ تشدد کے بعد پولیس سیکیورٹی میں پیپلز پارٹی اراکین آرام سے واپس روانہ ہوگئے۔
