کراچی: شہر قائد میں سی ٹی ڈی افسر اور اہلکاروں کے خلاف درج ایک اور مقدمہ سامنے آ گیا ہے۔
تفصیلات کے مطابق کراچی کے سولجر بازار تھانے میں اغوا اور بھتے کی دفعات کے تحت درج ایک اور مقدمہ سامنے آیا ہے جس میں سی ٹی ڈی افسر اور اہلکاروں کو نامزد کیا گیا ہے۔
یہ مقدمہ عینی نامی خاتون کی مدعیت میں اعلیٰ افسران کی تفتیش کے بعد درج کیا گیا ہے، ایف آئی آر کے متن کے مطابق 28 اکتوبر 2023 کو خاتون کے شوہر علی کو گھر سے اغوا کیا گیا تھا، اور سی ٹی ڈی اہلکاروں نے 20 لاکھ روپے بھتے کی رقم کا مطالبہ کیا تھا۔
خاتون نے 2 لاکھ کیش اور 8 لاکھ کا زیور سی ٹی ڈی افسر رفاقت کو دیا، رفاقت نے کہا 10 لاکھ میں نہیں ہوگا، 15 لاکھ اور لے کر آؤ، مقدمہ متن میں خاتون نے کہا کہ دوسرے دن میں نے اپنا سارا زیور بیچ کر 12 لاکھ روپے اور دے دیے۔
خاتون کے بیان کے مطابق سی ٹی ڈی افسران نے شوہر کو چھوڑنے کی بجائے اس کے خلاف جھوٹا مقدمہ درج کر دیا، بعد ازاں خاتون کی شکایت پر آئی جی سندھ نے شہری کے اغوا سے متعلق انکوائری کمیٹی تشکیل دی تھی، جس نے سی ٹی ڈی اہلکاروں کو اس الزام میں ملوث پایا۔
واضح رہے کہ سی ٹی ڈی افسر رفاقت اور دیگر پر ٹیپو سلطان تھانے میں بھی اغوا کا مقدمہ درج ہو چکا ہے۔
