کراچی: عیسیٰ نگری کے قریب خاتون نے اپنی قیمتی گاڑی کو ٹکر مارنے والے ٹرالر ڈرائیور پر گولیاں چلا دی جس کے بعد پولیس نے دونوں کے خلاف مقدمہ درج کرلیا۔
تفصیلات کے مطابق کراچی میں عیسیٰ نگری کے قریب ٹریفک حادثہ پیش آیا جہاں ٹریلر اور گاڑی میں ٹکر کے بعد خاتون نے ڈرائیور پر گولیاں چلادی تاہم ڈرائیور ٹریلر سے اتر کر بھاگا اور پولیس کے پیچھے چھپ گیا۔
اس واقعے کے بعد پولیس خاتون اور ٹریلر ڈرائیور کو پکڑ کر تھانے لے گئی اور مقدمہ درج کرلیا، حکام کا کہنا ہے ایک ہی ایف آئی آر میں دونوں کو نامزد کیا گیا ہے۔
مقدمے کے متن کے مطابق واقعہ عیسیٰ نگری کٹ کے قریب پیش آیا تھا، ٹریلر ڈرائیور اور خاتون دونوں غفلت اور لاپرواہی سےگاڑی چلارہے تھے اس دوران جب ٹریلر نے آگے نکلنے کی کوشش کی تو گاڑی کو سائیڈ لگی۔
مدعی پولیس افسر شبیر نے کہا کہ خاتون نے طیش میں آکر پستول نکالی اور ہوائی فائرنگ شروع کردی، خاتون نے اپنا نام علیشہ عامر بتایا جبکہ ٹرک ڈرائیور نے اپنا نام ظفر اقبال بتایا ہے۔
اےایس آئی شبیر نے بتایا کہ خاتون نے نائن ایم ایم پستول کا لائسنس بھی موقع پر پیش کردیا ہے جس کے بعد خاتون کو وومن تھانے اور ڈرائیور کو پی آئی بی تھانے منتقل کردیا گیا۔
