خیرپور: کراچی سے لاہور جانے والی کراچی ایکسپریس کی بوگی میں خوف ناک آتش زدگی کے باعث خاتون سمیت 7 افراد جاں بحق ہو گئے۔
تفصیلات کے مطابق گزشتہ رات کراچی سے لاہور جانے والی کراچی ایکسپریس کی بوگی میں سکھر کے قریب آگ لگ گئی، حادثے میں خاتون سمیت سات افراد جاں بحق ہو گئے ہیں۔
ایک ہی خاندان کے 4 بچے حادثے میں لا پتا ہو گئے تھے، جن کی لاشیں بھی سرچنگ کے دوران بوگی سے برآمد ہو گئی ہیں۔ ڈی سی او ریلوے محسن سیال نے بتایا کہ ٹرین سے جان بچانے کے لیے چھلانگ لگانے والی 70 سالہ خاتون نے زخمی ہونے کے بعد اسپتال میں دم توڑا، بوگی سے ملنے والی ایک جلی ہوئی لاش کی شناخت بھی کی جا رہی ہے۔
ذرائع کا کہنا ہے کہ ٹرین کی بوگی میں آگ ٹنڈو مستی اور خیرپور کے درمیان لگی تھی، جس کے باعث مسافروں نے چلتی ٹرین سے چھلانگیں لگائی تھیں۔
آتشزدگی کے واقعے کے بعد اندرون ملک جانے والی ٹرینوں کو مختلف اسٹیشنوں پر روک لیا گیا، تاہم اس وقت ٹرین کے اپ ٹریک اور ڈاؤن ٹریک کو بحال کر دیا گیا ہے، اور تمام ٹرینیں اپنی منزل کی جانب روانہ ہو چکی ہیں۔
دوسری طرف ٹرین حادثے میں لاپتا ہونے والے بچوں کے والد اکرام نے بتایا تھا کہ ان کے 4 بچے لاپتا ہوئے ہیں، جن میں ان کی ایک بیٹی اور 3 بیٹے شامل ہیں۔
ڈی سی او سکھر محسن سیال کے مطابق آتش زدگی کے بعد فائر بریگیڈ کی 2 گاڑیوں نے بوگی میں لگنے والی آگ پر قابو پایا، متاثرہ بوگی کے مسافروں کو دوسری بوگی میں منتقل کیا گیا۔
