کراچی: شہر قائد میں لٹیروں نے بڑی ڈکیتی مارنے کی کوشش کی تاہم جس گاڑی کو لوٹنے والے تھے، اس سے شہری کلاشنکوف کے ساتھ نکل آیا، اور پستول بردار لٹیرے کو سر پر پیر رکھ کر بھاگنا پڑا، تاہم اس کی ساتھی خاتون موقع پر پکڑی گئی۔
تفصیلات کے مطابق کراچی کے علاقے نارتھ ناظم آباد، بلاک ڈی میں گھر کے دروازے پر ایک گاڑی میں سوار افراد کو لوٹنے کی کوشش اس وقت بری طرح ناکام ہو گئی جب ڈرائیور کلاشنکوف لے کر باہر نکلا اور بھاگتے لٹیرے پر فائرنگ کر دی۔
اس واقعے کی سی سی ٹی وی فوٹیج بھی اے آر وائی نیوز نے حاصل کر لی ہے، جس میں دیکھا جا سکتا ہے کہ پستول ہاتھ میں لیے لٹیرا کس طرح جان کے خوف سے بھاگتا ہے اور پھسل کر گر پڑتا ہے، اور پھر اٹھ کر بھاگ جاتا ہے۔
لٹیرے گاڑی سے 19 لاکھ روپے لوٹنے آئے تھے، جیسے ہی گاڑی گھر کے دروازے پر رکی اور گھر کا دروازہ کھولا جانے لگا، موٹر سائیکل سوار لٹیرا پستول لیے بھاگتا آیا اور گاڑی کے کھلے دروازے میں گھس گیا، لیکن اس کے اوسان خطا ہو گئے جب اس نے اندر ڈرائیور کو کلاشنکوف اٹھاتے اور بولٹ لگاتے دیکھا۔
فوٹیج میں لٹیرے کو الٹے پاؤں بھاگتے، اور گرتے پڑتے فرار ہوتے دیکھا جا سکتا ہے، شہری گاڑی سے کلاشنکوف لے کر نکلا اور لٹیرے پر فائرنگ کر دی، وہاں موجود گھر کے دیگر افراد بھی پہلے سے تیار کھڑے تھے، وہ بھی لٹیروں کے پیچھے بھاگے، تاہم لٹیرے اپنی ساتھی خاتون کو چھوڑ کر فرار ہو گئے۔
شہریوں نے خاتون کو قابو کیا اور اسے تھپڑ بھی مارے، بعد ازاں کار سوار نے گاڑی کے اندر سے رقم نکالی اور گھر کے اندر لے گیا۔
