کراچی: گورنر سندھ کامران خان ٹیسوری کا کہنا ہے کہ چوبیس گھنٹے میں آٹا پرانی قیمت پر آجائے گا۔
اے آر وائی نیوز کے مطابق گورنر سندھ کامران خان ٹیسوری نے میڈیا سے گفتگو کرتے ہوئے کہا کہ بجلی، گیس کے بعد آٹا بھی نہیں مل رہا ہے لوگ مہنگائی سے پریشان ہیں مسائل اب حل ہونے چاہئیں۔
انہوں نے کہا کہ تاجر برادری کے مسائل حل کروں گا، آٹے کے بحران پر میری بات وفاق سے ہوئی ہے آئندہ ایک دو روز میں قیمت 35 روپے کم ہوجائے گی، چوبیس گھنٹے میں آٹا پرانی قیمت پر آجائے گا، چوبیس سے اڑتالیس گھنٹے میں آٹے کی فراہمی یقینی بنائیں گے۔
گورنر سندھ کا کہنا تھا کہ آٹا ذخیرہ کرنے والوں کے خلاف کریک ڈاؤن شروع ہورہا ہے۔
کامران ٹیسوری نے کہا کہ اسٹریٹ کرائم میں لوگوں کی جان جارہی ہے اس شہر کو کوئی اون کرنے کے لیے تیار نہیں، اسٹریٹ کرائم کے معاملے پر روزانہ آئی جی سندھ سے رابطے میں ہوں۔
انہوں نے کہا کہ مجھے 15 دن کا وقت پولیس چیف نے دیا تھا کہ چیزوں کو ٹھیک کریں گے 13 دن گزر گئے ہیں دو دن بعد میں رپورٹ لوں گا۔
گورنر سندھ نے مزید کہا کہ میں سندھ کی تمام مارکیٹوں کا دورہ کروں گا جو لوگ ذمہ دار ہیں ان کو کھلی کچہری میں بٹھائیں گے جب اختیارات اور مسائل کا حل عوام کے لیے ہوگا تو مسائل حل ہوں گے، کسی کو نہیں چھوڑیں گے سخت ایکشن ہوگا۔
