اسلام آباد: وزیراعظم عمران خان کا کہنا ہے کہ کراچی کے عوام کو صحت کے معاملے میں شدید خطرات لاحق ہیں، پاکستان کا مستقبل کراچی کے مستقبل سے جڑا ہے۔
تفصیلات کے مطابق وزیراعظم عمران خان کی زیرصدارت کراچی کے مسائل سے متعلق اجلاس ہوا، جہاں شہر میں صفائی مہم اور دیگر ترقیاتی منصوبوں میں پیشرفت کا جائزہ لیا گیا اور کراچی سے متعلق وزیرقانون فروغ نسیم کی سربراہی میں اعلیٰ سطح کمیٹی تشکیل دے دی گئی۔
اس موقع پر وزیراعظم کا کہنا تھا کہ کراچی پاکستان کا معاشی حب ہے، ماضی کی بدانتظامی، غفلت کا خمیازہ اس شہر کے عوام کو بھگتنا پڑرہا ہے، یہاں صحت کے معاملے میں شدید خطرات لاحق ہیں۔
انہوں نے کہا کہ صاف پانی کی قلت اور صفائی کا ناقص انتظام بڑے مسائل ہیں، کراچی کے عوام کو درپیش مسائل پر شدید تشویش ہے، چاہتے ہیں شہر کے مسائل حل ہوں اور عوام کو بہتر سہولتیں میسر آئیں۔
شہر کی مکمل صفائی تک کلین کراچی مہم جاری رہے گی: علی زیدی
عمران خان کا کہنا تھا کہ کراچی کے عوام کو درپیش مسائل پر وفاق ہرممکن کردار ادا کرے گی۔ وزیراعظم نے وزیرقانون فروغ نسیم کی سربراہی میں اعلیٰ سطح کمیٹی تشکیل دی ہے، کمیٹی میں فروغ نسیم، علی زیدی، خسروبختیار، ڈی جی ایف ڈبلیواو اور دیگر ممبران شامل ہیں۔
کمیٹی وفاق کی جانب سے شارٹ، میڈیم اور لانگ ٹرم لائحہ عمل تشکیل دےگی، کمیٹی کو مجوزہ لائحہ عمل سے متعلق سفارشات جلد پیش کرنے کی بھی ہدایت کردی گئی۔
اجلاس میں وزیراعظم کو کلین کراچی مہم میں اب تک کی پیشرفت پر بریفنگ دی گئی، صاف پانی کی فراہمی، سیوریج، صفائی اور ماس ٹرانزٹ سسٹم و دیگرامور پر بھی تبادلہ خیال ہوا۔
