کراچی: کے الیکٹرک کا ایسوسی ایٹ انجینئر فرقہ وارانہ ٹارگٹ کلنگ میں ملوث نکلا، ملزم کو لیاری ایکسپریس وے 13 ڈی کے قریب سے گرفتار کرلیا گیا۔
تفصیلات کے مطابق شہر قائد میں فرقہ وارانہ ٹارگٹ کلنگ میں ملوث کے الیکٹرک کے ایسوسی ایٹ انجینئر جاوید عرف وصی رضا کو گلشن اقبال پولیس نے گرفتار کرلیا، ملزم کے قبضے سے پستول اور بغیر نمبر پلیٹ کی موٹر سائیکل برآمد کرلی گئی۔
ایس ایس پی ایسٹ کا کہنا ہے کہ ملزم ایم کیو ایم لندن کے ٹارگٹ کلر علی چکنا کا قریبی ساتھی ہے، زوہیب پٹھان، علی رضا عرف رضا ٹی ٹی، شان حیدر پولیس والا، کاکا بندہ ملزم کی ٹیم میں شامل ہیں۔
پولیس کے مطابق گرفتار ملزم نے ٹارگٹ کلر علی رضا کے کہنے پر 2 کارکنان کی مکمل ریکی کی، ملزم کی ریکی مکمل ہونے کے بعد دونوں کارکنان کی ٹارگٹ کلنگ کی گئی۔
مزید پڑھیں: سی ٹی ڈی کی اہم کارروائی، پولیس اہلکار سمیت ایم کیو ایم لندن کے 3 ٹارگٹ کلرز گرفتار
ملزم نے پولیس کو دئیے گئے بیان میں کہا ہے کہ لائنز ایریا کے ندیم ہارڈویئر والے کو کالا پل پر ٹارگٹ کیا جبکہ شبیر سبزی والے کو لائنزایریا میں دکان پر ہی قتل کیا گیا۔
ملزم کے بیان کے مطابق ٹارگٹ کلنگ کی دونوں وارداتیں 2013 میں کی گئیں، مقتولین کا تعلق کالعدم تنظیم سے تھا۔
کے الیکٹرک انتظامیہ قانون نافذ کرنے والے ادارے سے مکمل تعاون کرے گی، ترجمان
دوسری جانب کے الیکٹرک کے ترجمان نے مؤقف پیش کیا ہے کہ ’’کے الیکٹرک قانون کی پاسداری کرنے والا ذمہ دار ادارہ ہے، ادارے میں کسی بھی سطح پر غیر قانونی سرگرمیوں کو برداشت نہیں کیا جاتا‘‘۔
کے الیکٹرک کے ترجمان کا کہنا تھا کہ مذکورہ شخص سے متعلق جب بھی ادارے کے حکام کو طلب کیا جائے گا تو انتظامیہ قانون نافذ کرنے والے ادارے سے مکمل تعاون کرے گی۔
واضح رہے کہ گزشتہ ماہ یکم مارچ کو سی ٹی ڈی نے اہم کارروائی کرتے ہوئے پولیس اہلکار سمیت ایم کیو ایم لندن کے تین ٹارگٹ کلرز گرفتار کیے تھے۔
گرفتار تینوں ملزمان کا تعلق ایم کیو ایم لندن سے ہے، ملزمان ٹارچرسیل چلانے، جلاؤگھیراؤ اور بھتے کی وارداتوں میں ملوث تھے۔
