کراچی: شہر قائد کے علاقے جوبلی سعید منزل پر لٹیروں نے ایک واردات میں کھیر ہاؤس کی دکان پر لوٹ مار کی اور فرار ہو گئے۔
تفصیلات کے مطابق جوبلی سعید منزل کھیر ہاؤس پر ڈکیتی کی واردات ہوئی ہے، جس کی فوٹیج اے آر وائی نیوز نے حاصل کر لی ہے، واردات کھیر ہاؤس میں گاہک بن کر داخل ہونے والے 2 لٹیروں نے کی۔
فوٹیج میں دیکھا جا سکتا ہے کہ 2 لٹیرے کسٹمرز اور دکان دار کو لوٹ کر فرار ہو گئے، دونوں دکان کے اندر گاہک بن کر داخل ہوئے تھے، موقع دیکھ کر ایک نے پستول نکالا اور دوسرے نے لوٹنا شروع کر دیا۔
فوٹیج کے مطابق لٹیروں نے یکے بعد دیگرے چار گاہکوں کو لوٹا، اس دوران بزرگ سیکیورٹی گارڈ بے بسی سے لوٹ مار دیکھتا رہا، لٹیرے نے بزرگ سیکیورٹی گارڈ سے شاپنگ بیگ بھی مانگا تھا۔
ڈاکو نے کاؤنٹر پر بیٹھے مالک کو پہلے لوٹا اور پھر کیش کاؤنٹر خالی کر دیا، کیش کاؤنٹر سے نکالی گئی ساری رقم شاپنگ بیگ میں ڈالی اور فرار ہو گئے۔
واضح رہے کہ کراچی شہر ڈاکوؤں اور اسٹریٹ کرائم میں ملوث لٹیروں کے لیے جنت بن چکا ہے، جب کہ انتظامیہ اور پولیس کی کارکردگی کہیں بھی نظر نہیں آتی۔
