کراچی: شہر قائد کی تاریخ کی پہلی میراتھن کا آغاز ہوگیا ہے جس میں پہلی بار بین الاقوامی معیار کی 42.2 کلو میٹر دوڑ شامل ہے۔
تفصیلات کے مطابق ورلڈ ایتھلیٹکس فیڈریشن سے منظور شدہ پہلی کراچی میراتھن ریس کا انعقاد ہوگیا، میراتھن کا سی ویو کلفٹن کے ساحل پر نشان پاکستان سے آغاز اور اسی مقام پر اختتام پذیر ہوگی۔
میراتھن کے 3 ایونٹس میں ہاف میراتھن، 4 رکنی ٹیم مقابلہ اور 5 کلو میٹر کی دوڑ شامل ہے، میراتھن ریس کے شرکا میں کامیاب ہونے والوں میں انعامات بھی تقسیم کئے جائیں گے۔
اس دورانن کراچی میراتھن آرگنائزر شعیب نظامی نے میڈیا سے گفتگو کرتے ہوئے کہا کہ میراتھن ریس پہلی بار کراچی میں اتنی بڑی سطح پر کروائی جارہی ہے، سیکیورٹی اداروں اور سندھ حکومت کے مشکور ہیں۔
شعیب نظامی کا کہنا تھا کہ ریس میں شریک ایتھلیٹس کے پاس چپ موجود ہیں جو ان کی پوزیشن بتائیں گے، 42 اور 21 کلو میٹر کی ریس کا انعقاد کیا ہے، دوسری ریس میں گروپس کی شکل میں ریس لگے گی۔
انہوں نے مزید کہا کہ فیملیز کو بھی ریس میں دعوت دی ہے تاکہ ان کی حوصلہ افزائی ہو، اس ریس کی بدولت بین الاقوامی سطح پر رجسٹرڈ ہوجائیں گے جس کے بعد اگلے سال کراچی میں انٹرنیشنل سطح پر ریس کرواسکیں گے۔
