کراچی: وزیر اعلیٰ سندھ مراد علی شاہ نے کہا ہے کہ حیدر آباد، سکھر، میر پور خاص اور لاڑکانہ کے میئر جیالے ہوں گے، کراچی کا میئر بھی پیپلز پارٹی کا جیالا ہوگا، جو اس شہر کی بھرپور خدمت کرے گا۔
تفصیلات کے مطابق وزیر اعلیٰ سندھ مراد علی شاہ نے ضمنی بلدیاتی انتخابات میں پیپلز پارٹی کی کامیابی پر اظہار تشکر کرتے ہوئے آصف زرداری، بلاول بھٹو اور جیالوں کو مبارک باد دی ہے، اور کہا کہ سندھ کے تمام ضلعی کونسلوں کے چیئرمین جیالے ہوں گے۔
وزیر اعلیٰ سندھ نے کہا کہ پیپلز پارٹی نے ہمیشہ عوام کی خدمت کی ہے، عوام کا ہم پر بھرپور اعتماد ہے، کراچی میں بغیر کسی تفریق پیپلز پارٹی نے ریکارڈ ترقیاتی کام کرائے، سڑکیں، انڈر پاسز، فلائی اوورز، اسپتال اور نکاسی کے نظام کو ترجیحی بنیادوں پر تعمیر کیا۔
مراد علی شاہ نے کہا ’’مردم شماری پر پیپلز پارٹی نے عوامی مفاد میں واضح مؤقف رکھا، پیپلز پارٹی نے کراچی کے عوام کے حقوق کی جنگ کھلے دل سے لڑی ہے، امن و امان کی بحالی کے لیے بھرپور اقدامات اٹھائے جس سے شہر امن کا گہوارہ بن گیا ہے۔‘‘
انھوں نے کہا کراچی کے عوام کا شکریہ جنھوں نے اعتماد کیا اور مزید خدمت کرنے کا اختیار دیا، سندھ شہید محترمہ بینظیر بھٹو کے جیالوں کا صوبہ ہے۔
