کراچی : گزشتہ سال چودہ اگست کو نمائش چورنگی لاپتہ ہونے والی عائشہ کو اہل خانہ کے سپرد کردیا گیا ، بچی کی والدہ کا کہنا ہے کہ دس ماہ جس کرب میں گزرے ناقابل بیان ہے۔
تفصیلات کے مطابق گزشتہ سال چودہ اگست کو نمائش چورنگی لاپتہ ہونے والی عائشہ دس ماہ بعد والدین مل گئی، دس ماہ بعد جب بیٹی ماں کو ملی تو پہچان نہ سکی۔
پولیس نے عائشہ کو اہل خانہ کے سپرد کیا، والدہ کا کہنا ہے کہ دس ماہ جس کرب میں گزرے ناقابل بیان ہے، بیٹی کو ڈھونڈنے کیلئے ہر ممکن کی کوشش کی، بیٹی کےغم میں میرے شوہربیمار ہوگئے، اےآروائی کا شکریہ جو ہمارا ساتھ دیا۔
مزید پڑھیں :14 اگست کو نمائش چورنگی سے لاپتہ 4 سالہ عائشہ مل گئی
ننھی عائشہ کی دیکھ بھال کرنے والے خاندان کا کہنا تھا کہ یہ بچی سرجانی لیاری کی ایک فیملی کے پاس تھی جسے برے حال میں رکھا جارہا تھا، ہم نے اسے رکھ لیا اور اپنے بچوں کی طرح دیکھ بھال کی، سوشل میڈیا سےوالدین کا پتا چلا تو رابطہ کیا۔
ننھی عائشہ کی دیکھ بھال کرنے والے خاندان نے پولیس کو بیان دیتے ہوئے کہا تھا کہ عائشہ3 ،4ماہ سےہمارےپاس تھی، بچی کو سرجانی کے علاقے لیاری میں فیملی نےقیدکررکھاتھا، وہ لوگ بچی کونہ کھاناکھلاتےنہ پہننےکوکپڑےدیتےتھے، جن لوگوں کےپاس پہلے بچی تھی وہ اسےفروخت کرنا چاہتے تھے۔
پولیس کے مطابق عبدالمعیزنامی شخص بچی اور اس کی والدہ کو لے عزیز آباد تھانے پہنچے اور حالت سے پولیس کو آگاہ کیا۔
عبدالمعیز نے بتایا کہ بچی جس وقت فیملی کو ملی اس کی حالت غیر تھی، بچی 3ماہ تک دوسری فیملی کے پاس رہی، اس سے قبل سمیر اورسیما نے بچی کو اپنے پاس رکھا ہواتھا۔
ایس ایس پی سینٹرل نے بتایا کہ سرجانی میں مبینہ اغوا کاروں کی گرفتاری کیلئے ٹیم بھیجی ہے، مبینہ اغوا کاروں کی شناخت سیمااورسمیرکےنام سے ہوئی، بعد ازاں بچی کو اغوا کرنے والے ملزمان سیما اور سمیرکو گرفتار کرلیا گیا ہے۔
وزیر داخلہ سندھ ضیاالحسن لنجار نے نمائش چورنگی سےاغوا بچی کی بازیابی پرپولیس کوشاباش دیتے ہوئے ایس ایس پی سینٹرل اور انکی ٹیم کی کارکردگی کو سراہا اور کہا ٹیم نے 10ماہ قبل اغوا بچی کوبازیاب کرکےوالدین کو خوشی دی۔
نمائش چورنگی سے 14 اگست کولاپتہ بچی کی بازیابی پر گورنر سندھ کامران ٹیسوری نے ایس ایس پی ذیشان صدیقی سے رابطہ کرکے انھیں اور ان کی ٹیم کو شاباشی دی۔
کامران ٹیسوری کا کہنا تھا کہ میں پولیس سےبچی کےمعاملے پروقتافوقتاًرابطےمیں تھا، خوشی ہےننھی عائشہ کواس کےوالدین مل گئے۔
