کراچی : کریم آباد میں نامعلوم ملزمان نے موٹرسائیکل سوار شہری کو فائرنگ کرکے قتل کردیا تاہم مقتول کی شناخت تاحال نہ ہوسکی۔
تفصیلات کے مطابق کراچی کے علاقے کریم آباد کے قریب نامعلوم ملزمان کی فائرنگ سے ایک شخص جاں بحق ہوگیا، ایس ایس پی سینٹرل ذیشان صدیقی نے بتایا کہ مقتول موٹرسائیکل پر سوار تھا، موٹر سائیکل سوار 2ملزمان فائرنگ کرکے فرارہوئے۔
ایس ایس پی سینٹرل کا کہنا تھا کہ مقتول کو پیچھےسر میں گولی مارکرقتل کیا گیا، واقعہ ذاتی دشمنی یاٹارگٹ کلنگ کاہوسکتا ہے۔
ذیشان صدیقی نے کہا کہ لاش کو پوسٹ مارٹم کیلیےاسپتال منتقل کردیاگیا ہے تاہم مقتول کی شناخت تاحال نہیں ہوسکی۔
انھوں نے بتایا کہ ملزمان مقتول کاموبائل فون بھی ساتھ لے گئے ہیں تاہم جائے وقوعہ سے9 ایم ایم پستول کے 3خول ملےہیں۔
دوسری جانب کریم آباد میں فائرنگ سے شہری کی ہلاکت پر پولیس نے سی سی ٹی وی حاصل کرلی ، سی سی ٹی وی میں موٹرسائیکل پر دو مسلح ملزمان کو دیکھا جاسکتا ہے۔
پولیس کا کہنا ہے کہ موٹرسائیکل سوار ملزمان پیچھے سے مقتول کو فائر کرتے ہیں، مقتول جیسےہی گرتا ہے ملزمان موبائل اٹھاکرفرارہوجاتےہیں۔
پولیس کے مطابق ملزمان نے مبینہ طور پر ڈکیتی کا رنگ دینے کی کوشش کی تاہم سی سی ٹی وی کی مدد سے ملزمان کی تلاش شروع کر دی ہے۔
