کراچی : اے ایس پی علینہ راجپر جمشید ٹاؤن نے گرومندر پر دو بھائیوں کے قتل کے معاملے کو ذاتی دشمنی کا شاخسانہ قرار دے دیا۔
تفصیلات کے مطابق کراچی کے علاقے گرومندر میں کار پر فائرنگ کرکے دو افراد کو قتل کردیا گیا جبکہ دو افراد زخمی ہوئے۔
اے ایس پی علینہ راجپر جمشید ٹاؤن نے معاملہ ذاتی دشمنی کا شاخسانہ قرار دے دیا اور کہا اور ہوسکتا ہے کہ یہ معاملہ آئس کریم پارلر مالک کے قتل سے جڑا ہو، وہ آج کیس کی پیشی پرجارہے تھے۔
23 دسمبر کو اسی جگہ پر ہی آئس کریم پارلر مالک اعجاز کا قتل اور ملازم زخمی ہوا تھا، مقتول محمد اعجاز کے بھائی ریاض نے پانچوں بھائیوں کو قتل کا ذمہ دار قرار دیا اور مدعی نے پانچوں بھائی شان ،زبیر ،ساجد ،واجد اور عمیر کو مقدمے میں نامزد کیا تھا۔
پولیس نے مدعی کی نشاندہی پر بیلہ میں نامزد بھائیوں کے گھر پر چھاپہ بھی مارا تھا ، آج قتل وزخمی ہونیوالے بھائیوں نے عدالت سےضمانت لےرکھی تھی اور مقتولین اسی مقدمے میں پیشی پر جا رہے تھے کہ فائرنگ کا واقعہ پیش آیا۔
دوسری جانب ایدھی رضاکار کے مطابق ملزمان نے گولیاں مارنے کے بعد گاڑی میں جھانک کر تسلی کی کار سوار مرچکے ہیں، اس کے بعد ایک کار سے ایک شخص جو زندہ بچ چکا تھا، میری طرف آیا تو اسے اسپتال پہنچا دیا۔
پولیس کو جائے وقوعہ سے سترہ خول ملے ہیں، سی سی ٹی اور دیگرشواہد اکھٹے بھی کئے جارہے ہیں۔
یاد رہے آج صبح تین موٹر سائیکل سوار مسلح چھ ملزمان نےکارپر سرعام تین اطرف سے فائرنگ کی ،کار میں پانچ بھائی سوار تھے، جن میں دو جاں بحق ، اور دو زخمی ہوئے جبکہ ایک معجزاتی طورپرمحفوظ رہا تھا۔
