کراچی کے علاقے نارتھ ناظم آباد میں آٹو پارٹس کے تاجر کے قتل کی سی سی ٹی وی فوٹیج سامنے آگئی۔
اے آر وائی نیوز کے مطابق کراچی کے علاقے نارتھ ناظم آباد میں گزشتہ روز آٹو پارٹس کے شعبے سے وابستہ آصف کو نامعلوم افراد نے فائرنگ کرکے قتل کردیا تھا لیکن اب فائرنگ کے بعد کی ویڈیو سامنے آئی ہے جس میں دیکھا گیا کہ زخمی حالت میں وہ خود گاڑی چلا کر سڑک پر پہنچا۔
فوٹیج میں دیکھا جاسکتا ہے کہ آصف زخمی حالت میں گاڑی چلا کر سڑک کنارے پہنچتا ہے جہاں پر پچھلی سیٹ پر بیٹھا شخص تیزی سے جاکر دروازہ کھولتا ہے۔
بعدازاں وہ لوگوں سے مدد طلب کرنے کے لیے چیخ و پکار کرتا ہے جس کے بعد لوگ جمع ہوتے ہیں اور اگلی سیٹ پر بیٹھا شخص گاڑی سے اترتا ہے بعد میں اسی گاڑی میں اسے قریبی اسپتال منتقل کیا جاتا ہے۔
تاجر دوران علاج زخموں کی تاب نہ لاتے ہوئے دم توڑ جاتا ہے۔
پولیس کا کہنا ہے کہ تاحال واقعے کا مقدمہ درج نہیں کیا گیا ہے آج تدفین ہوگی اس کے بعد اہلخانہ کی جانب سے واقعے کا مقدمہ درج کروایا جائے گا۔
پولیس حکام کے مطابق اگر مقتول کے اہلخانہ نے مقدمہ درج نہ کروایا سرکار کی مدعیت میں مقدمہ درج ہوگا۔
