کراچی: شہر قائد کے علاقے بن قاسم میں پارکو پائپ لائن سے تیل چوری میں ملوث مطلوب ملزم کو زخمی حالت میں گرفتار کر لیا گیا۔
تفصیلات کے مطابق کراچی میں بن قاسم میں پارکو پائپ لائن سے تیل چوری میں ملوث ملزم پکڑا گیا، ملزم کی شناخت محمد اشرف کے نام سے ہوئی ہے، جو پولیس کو مطلوب تھا۔
پولیس حکام نے کہا ہے کہ ولی ٹاؤن میں پولیس اہل کاروں اور ملزمان کے درمیان دو طرفہ فائرنگ کے بعد محمد اشرف زخمی حالت میں گرفتار ہوا۔
پولیس حکام کے مطابق گرفتار ملزم اشرف تیل چوری گروہ کا ماسٹر مائنڈ ہے، مقابلے کے دوران اس کے دیگر ساتھی موقع سے فرار ہونے میں کامیاب ہوئے۔
پولیس کا کہنا ہے کہ گرفتار ملزم نے کلپ کی مدد سے پارکو کی پائپ لائن کو کئی بار نقصان پہنچایا، اس کے قبضے سے اسلحہ بھی برآمد ہوا ہے۔
