کراچی: شہر قائد میں پولیس نے کارروائی کر کے عالمی نیٹ ورک سے منسلک منشیات فروش کو ساتھیوں سمیت گرفتار کر کے بڑی مقدار میں آئس برآمد کرلی۔
اے آر وائی نیوز کے مطابق ڈی آئی جی ساؤتھ جاوید اکبر ریاض نے ہفتے کے روز ملزمان کی گرفتاری کے حوالے سے پریس کانفرنس کرتے ہوئے اس کارروائی کو اہم قرار دیا۔
انہوں نے بتایا کہ کراچی کے ضلع کیماڑی کے علاقے موچکو کی حدود میں اہم کارروائی کی گئی ہے، جس میں ڈرگ ڈیلرکو 4ساتھیوں سمیت گرفتارکیا گیا۔
ڈی آئی جی کے مطابق ملزمان کے قبضے سے 8 کروڑ روپے مالیت کی 11کلو آئس، 10 کلو چرس برآمد کی گئی، ماضی میں کبھی اتنی بڑی مقدار میں آئس برآمد نہیں کی گئی۔
مزید پڑھیں: منشیات فروشوں کی سرپرستی کرنے والے کالی بھیڑوں کی فہرست تیار
یہ بھی پڑھیں: منشیات فروشوں سے آہنی ہاتھوں سے نمٹنا ہوگا، آرمی چیف
جاوید اکبر ریاض کے مطابق مرکزی ملزم محسن سے 10 کلو جبکہ رئیس گوٹھ سے ایک کلوآئس برآمد کی گئی۔
انہوں نے بتایا کہ ملزمان نے تفتیش کے دوران عالمی نیٹ ورک کے ساتھ کام کرنے کا انکشاف کیا اور بتایا کہ ڈیفنس کلفٹن میں بھی اُن کے کارندے موجود ہیں۔
پولیس افسر نے مزید کہا کہ ’ہم نے پورے نیٹ ورک کی نشاندہی کرلی، جلد تمام کارندوں کو گرفتار کیا جائے گا‘۔
