کراچی: شہر قائد کے علاقے صدر موبائل مارکیٹ میں پولیس نے کچرے کو جواز بنا کر کارروائی کرتے ہوئے دکاندار کو گرفتار کرلیا۔
تفصیلات کے مطابق کراچی کے علاقے صدر موبائل مارکیٹ میں پولیس نے کارروائی کرتے ہوئے دکاندار کو گرفتار کرلیا، صدر الیکٹرانک مارکیٹ رضوان عرفان کا کہنا ہے کہ دکاندار اپنی دکان میں کام میں مصروف تھا، ہوا چلنے سے پلاسٹک کا چھوٹا سا ٹکڑا دکان میں چلا گیا، پولیس اور مختیار کار نے کچرے کا جواز بنا کر دکاندار کو گرفتار کرلیا۔
[bs-quote quote=”دکانداروں کو ایسے ہراساں کیا گیا تو وہ کام کیسے کریں گے” style=”style-8″ align=”left” author_name=”صدر الیکٹرانک مارکیٹ” author_job=”رضوان عرفان”][/bs-quote]
صدر الیکٹرانک مارکیٹ رضوان عرفان نے کہا کہ متعلقہ اداروں نے دکاندار کی ایک نہ سنی اور مقدمہ درج کرلیا۔
رضوان عرفان کے مطابق واقعے کی سی سی ٹی وی فوٹیج موجود ہے، دکانداروں کو ایسے ہراساں کیا گیا تو وہ کام کیسے کریں گے۔
دوسری جانب پولیس حکام کا کہنا ہے کہ کچرے سے متعلق وزیراعلیٰ سندھ سید مراد علی شاہ کا سخت دباؤ ہے، سخت احکامات کی وجہ سے مقدمات درج کرنا پڑرہے ہیں۔
واضح رہے کہ 26 ستمبر کو کراچی کے باسی عبدالجبار کو سڑک پر کچرا پھینکنا مہنگا پڑ گیا تھا، اس جرم کی پاداش میں پولیس نے اسے گرفتار کرکے مقدمہ درج کرلیا تھا۔
حکومت سندھ کی جانب سے شہر میں دفعہ 144 کے نفاذ کا حکم نامہ ملتے ہی پولیس حرکت میں آگئی اور سکھن پولیس نے شہری کو گرفتار کرکے دفعہ 144 کے تحت مقدمہ درج کرلیا تھا۔
