The news is by your side.

Advertisement

کراچی، گھروں کے باہر ڈکیتیاں کرنے والے گروہ کا کارندہ گرفتار

کراچی: شہر قائد کی پولیس نے کامیاب کارروائی کرتے ہوئے گھروں کے باہر ڈکیتیاں کرنے والے گروہ کے کارندے کو گرفتار کرلیا۔

تفصیلات کے مطابق کراچی کے علاقے بریگیڈ میں گھر کے باہر شہری کو لوٹنے والے کارندے کو پولیس نے کامیاب کارروائی کرتے ہوئے گرفتار کرلیا، ملزم کی گرفتاری سی سی ٹی وی فوٹیج کی مدد سے عمل میں آئی۔

پولیس کا کہنا ہے کہ ملزم نے ساتھی کے ساتھ مل کر گھر کے باہر شہری کو لوٹا تھا، ملزم سفیان اسلحہ کے زور پر شہریوں سے لوٹ مار میں ملوث ہے۔

ایس ایس پی ایسٹ کا کہنا ہے کہ ملزم سفیان سے اسلحہ اور لوٹا ہوا سامان برآمد کرلیا گیا ہے جبکہ اس کے دیگر ساتھیوں کی تلاش جاری ہے۔

واضح رہے کہ گزشتہ روز پولیس نے کراچی کے علاقے ملیر کھوکھراپار میں کارروائی کرتے ہوئے ایم کیو ایم لندن کے ٹارگٹ کلر رضا الدین عرف رضا بھائی کو گرفتار کیا تھا۔

مزید پڑھیں: کراچی پولیس کی کارروائی، ایم کیو ایم لندن کا ٹارگٹ کلر گرفتار

پولیس کا کہنا تھا کہ ملزم نے اے ایس آئی سمیت دو پولیس اہلکاروں کو ہلاک کیا تھا، ملزم رضا الدین ملیر سیکٹر کی ٹارگٹ کلنگ ٹیم کا انچارج تھا۔

یاد رہے کہ گزشتہ روز کراچی کے علاقے گلبہار میں مبینہ پولیس مقابلے میں ایک ملزم مارا گیا تھا اور 2 زخمی ہوگئے تھے۔

ملزمان کی فائرنگ سے پولیس اہلکار بھی زخمی ہوا تھا، پولیس کا کہنا تھا کہ ملزمان توصیف، راقب اور آصف سگے بھائی ہیں، دوستوں کے ساتھ مل کر ڈکیتیاں کرتے تھے۔

ایس ایس پی عارف اسلم کا کہنا تھا کہ تینوں ملزمان گھر میں ڈکیتی کی نیت سے داخل ہوئے تھے، ملزمان کچھ عرصہ قبل ہی جیل سے رہا ہوکر آئے تھے۔

خیال رہے کہ گزشتہ ماہ کراچی پولیس نے نیو ٹاؤن کے علاقے میں کارروائی کرتے ہوئے جعلی سیکیورٹی کمپنی بنا کر عوام کو لوٹنے والے 5 ملزمان کو گرفتار کیا تھا۔

Comments

comments

یہ بھی پڑھیں