کراچی : سپرہائی وے پر منشیات فروشوں نے پولیس موبائل پر حملہ کردیا، پولیس کی جوابی فائرنگ سے دو ملزمان زخمی حالت میں فرار ہوگئے اہلکاروں نے جنگل کو آگ لگادی۔
کراچی کے علاقے سائٹ سپرہائی وے فقیرا گوٹھ میں پولیس مقابلے کا واقعہ پیش آیا ہے اس حوالے سے پولیس حکام کا کہنا ہے کہ پولیس مطلوب منشیات فروشوں کی گرفتاری کے لیے علاقے میں پہنچی تھی۔
ڈی ایس پی سہراب گوٹھ کی سربراہی میں جیسے ہی پولیس موبائل علاقے میں داخل ہوئی تو وہاں موجود منشیات فروشوں نے پولیس پارٹی پر فائرنگ کردی جس کے جواب میں اہلکاروں نے بھی بھرپور مقابلہ کیا۔
پولیس اہلکاروں کی جوابی فائرنگ سے دو منشیات فروش زخمی ہوگئے تاہم ملزمان زخمی حالت میں ہی قریبی جنگل میں جا کر چھپ گئے، پولیس نے ملزمان کا تعاقب کیا اور ان کی گرفتاری کیلئے جنگل کو آگ لگادی۔
اس حوالے سے پولیس ذرائع کا کہنا ہے کہ مقابلے کے دوران جنگل کی طرف فرار ہونے والے دو زخمی ملزمان2پستول اور منشیات چھوڑ کر فرار ہوئے جو قبضے میں لے لی گئی ہے۔
پولیس حکام کے مطابق اس آپریشن کی سربراہی ڈی ایس پی سہراب گوٹھ کررہے ہیں اور ملزمان کا تعاقب تاحال جاری ہے، زخمی ہونے والے ملزمان میں بدنام زمانہ منشیات فروش دادن کا بھائی بھی شامل ہے، پولیس نے دادن کا اڈہ مسمار کیا تھا۔
