کراچی: شہر قائد کے علاقے اورنگی ٹاؤن مومن آباد میں پولیس اہلکار نے موٹر سائیکل ٹکرانے پر نوجوان کو گولی مار دی، واقع سے متعلق ایک فوٹیج بھی سامنے آئی ہے۔
تفصیلات کے مطابق اورنگی ٹاؤن مومن آباد میں جھگڑے کے دوران پولیس اہلکار کی فائرنگ سے ایک نوجوان جاں بحق اور ایک زخمی ہو گیا ہے، اے آر وائی نیوز کو حاصل فوٹیج میں پولیس اہلکار کو اپنے دوست کے ساتھ موٹر سائیکل پر گلی میں آتے دیکھا جا سکتا ہے۔
پولیس اہلکا رنے موٹر سائیکل سے اتر کرنوجوان کو تشدد کا نشانہ بنانا شروع کیا، عوام جمع ہوئی تو پولیس اہلکار نے اسلحہ نکال لیا اور تلخ کلامی کے دوران اس نے فائرنگ کر دی، جس سے گلی میں بھگدڑ مچ گئی۔
فائرنگ کے نتیجے میں نوجوان فہیم اور اس کا دوست انس زخمی ہوئے، شہریوں نے زخمیوں کو اسپتال منتقل کرنے کی کوشش کی لیکن اس دوران فہیم زخموں کی تاب نہ لاتے ہوئے چل بسا۔
شہر قائد میں موٹر سائیکل اور گاڑیوں پر اصل یا اصل جیسی نمبر پلیٹ لگانا لازمی قرار
فہیم کے ورثا کا کہنا ہے کہ مقتول فہیم نجی اسپتال میں وارڈ بوائے تھا، فائرنگ کے واقعے میں 2 پولیس اہلکار اور 3 سادہ لباس افراد ملوث ہیں، نامزد افراد کے خلاف مومن آباد تھانے میں مقتول کے والد محمد یاسین کی مدعیت میں مقدمہ بھی درج کروا لیا گیا ہے، تاہم واقعے میں ملوث کسی شخص کو تا حال گرفتار نہیں کیا گیا، لواحقین نے مطالبہ کیا کہ تمام افراد کو گرفتار کر کے سخت سے سخت سزا دی جائے۔
واضح رہے کہ یہ افسوس ناک واقعہ گزشتہ روز توحید کالونی میں پیش آیا تھا، مدعی مقدمہ محمد یاسین نے بتایا کہ ان کے بیٹے فہیم کا اشتیاق سے موٹر سائیکل آپس میں ٹکرانے پر جھگڑا ہوا تھا، جس پر اشتیاق نے اپنے دیگر ساتھیوں کے ساتھ مل کر فہیم پر فائرنگ کر دی، گولی فہیم اور اس کے دوست انس کو لگی، فہیم اسپتال پہنچنے سے قبل ہی راستے میں دم توڑ گیا
پولیس حکام کے مطابق مقدمے میں ملزم اشتیاق، آصف، ذیشان، ثاقب اور تنزیل کو نامزد کیا گیا ہے، مرکزی ملزم اشتیاق اپنے دیگر ساتھیوں کے ساتھ فرار ہے جس کی تلاش جاری ہے، جب کہ ملزم اشتیاق پولیس اہلکار ہے اور وہ عزیز آباد تھانے میں تعینات ہے۔
