کراچی پورٹ پر اینٹی نارکوٹکس فورس (اےاین ایف) کے عملے نے تولیے کی آڑ میں نشہ آور گولیوں کی بڑی کھیپ اسمگل کرنے کی کوشش ناکام بنادی۔
اے آر وائی نیوز کی رپورٹ کے مطابق اے این ایف پورٹ کنٹرول یونٹ نے خفیہ اطلاع پر کارروائی کرتے ہوئے بھاری مقدار میں نشہ آور گولیاں اسمگل کرنے کی کوشش کو ناکام بنادیا۔
کارروائی کے دوران 3بین الاقوامی اسمگلرز کو گرفتار کرلیا گیا، اےاین ایف کے مطابق برآمد شدہ گولیوں کی قیمت بین الاقوامی منڈی میں کروڑوں روپے ہے۔
اس حوالے سے ترجمان اےاین ایف نے بتایا کہ اینٹی نارکوٹکس فورس کی جانب سے کارروائی کراچی انٹرنیشنل کنٹینر ٹرمینل پر کی گئی، جہاں دبئی جانے والے کنٹینر کو روکا گیا تھا۔
تولیہ کٹ پیس ایکسپورٹ کے نام پر ایک کنٹینر کو بک کیا گیا تھا، پورٹ کنٹرول یونٹ کی جانب سے کنٹینرکی تلاشی لی گئی، اس دوران بھاری مقدار میں 3لاکھ نشہ آور گولیاں ملیں۔
برآمد کیے گئےسامان میں 20کاٹن مشتبہ آئی ڈراپس کے بھی ہیں، گولیوں کو کپڑوں کے اندر مہارت سے چھپایا گیا تھا۔
اینٹی نارکوٹکس فورس کے مطابق برآمد ہونے والی آئی ڈراپس کا لیبارٹری سے ٹیسٹ کروا رہے ہیں، گرفتار اسمگلرز کیخلاف کلفٹن پولیس اسٹیشن میں مقدمہ درج کرلیا گیا ہے۔
