کراچی: شہر قائد کے علاقے نارتھ ناظم آباد میں جائیداد کے تنازع پر فائرنگ کا واقعہ پیش آیا جس کے نتیجے میں 1 خاتون جاں بحق ہوگئیں۔
اے آر وائی نیوز کی رپورٹ کے مطابق کراچی کے علاقے نارتھ ناظم آباد کی کوثر کالونی میں جائیداد کے معاملے ایک ہی خاندان کے افراد کے درمیان جھگڑا ہوا جو خونی تنازع میں تبدیل ہوگیا۔
پولیس حکام کے مطابق تنازع کے دوران ایک شخص نے فائرنگ کی جس کے نتیجے میں دو خواتین ، ایک بچے سمیت پانچ افراد زخمی ہوئے جبکہ فریقین نے ایک دوسرے پر ڈنڈوں کا آزادانہ استعمال کیا جس کے نتیجے میں بھی مکین زخمی ہوئے۔
مزید پڑھیں: کراچی، جائیداد میں حصہ مانگنے پر بھائیوں نے بہن کو قتل کردیا
تمام زخمیوں کو ایمبولینس کی مدد سے نجی اور عباسی شہید اسپتال منتقل کردیا گیا۔
علاقہ مکینوں نے جھگڑے کے دوران فائرنگ کرنے والے شخص شہزاد کے فرار ہونے کی کوشش ناکام بنائی جسے پولیس نے حراست میں لے کر اسلحہ برآمد کرلیا۔ پولیس حکام نے ملزم کو تھانے منتقل کردیا۔
ذرائع کے مطابقمتاثرہ گھرانے کے افراد کا کہنا ہے کہ وہ اسپتال سے فارغ ہو کر ملزم کے خلاف مقدمہ درج ضرور کرائیں گے۔پولیس حکام کے مطابق فائرنگ کے نتیجے میں زخمی ہونے والی خاتون سیما دوران علاج دم توڑ گئیں، گرفتار ہونے والا ملزم مقتولہ کا بیٹا ہے۔
