کراچی : شہر قائد میں تیز ہوائیں چل پڑیں، مختلف علاقوں سے کہیں تیز اور کہیں ہلکی بارش کی اطلاعات موصول ہورہی ہیں۔
کراچی کے مختلف علاقوں ملیر، گڈاپ اور کاٹھور اطراف کے مضافات میں بارش اور ژالہ باری کی اطلاعات ہیں، اس کے علاوہ گلشن اقبال اور آس پاس کے علاقوں میں تیز بارش ہورہی ہے۔
شہرکے مختلف علاقوں میں آسمانی بجلی چمکنے لگی، لانڈھی، کورنگی، شاہ فیصل کالونی، گڈاپ میں ہلکی بوندا باندی ہورہی ہے، بلدیہ ٹاؤن، حب چوکی اور اطراف میں گرد آلود ہوائیں چل رہی ہیں۔
محکمہ موسمیات کے مطابق رواں ہفتے کے دوران ملک کے مختلف حصوں میں آندھی اور گرج چمک کے ساتھ موسلادھار بارش کی توقع ہے، لاہور پی ڈی ایم اے کی جانب سے تمام متعلقہ اداروں کو الرٹ رہنے کی ہدایات جاری کی گئی ہیں۔
محکمہ موسمیات کے مطابق 21 مارچ سے مضبوط مغربی لہر کا پاکستان میں داخل ہونے کا امکان ہے، مغربی لہر 22 مارچ کو ملک کے بیشتر علاقوں کو اپنی لپیٹ میں لے گی، 21سے 24 مارچ کے دوران لاہور، اسلام آباد، مری، راولپنڈی بارش کا امکان ہے۔
پی ڈی ایم اے کے مطابق ژالہ باری کے باعث کھڑی فصلوں اور کمزور انفرسٹرکچر کو نقصان پہنچنے کا خدشہ ہے، تاہم مری میں لینڈ سلائیڈنگ کا خطرہ بھی موجود ہے۔
