کراچی: شارٹ ٹرم اغوا میں ملوث ایس آئی یو اہل کار کے بارے میں بتایا گیا ہے کہ وہ شادی کی رخصت پر جانے کے بعد محکمے میں واپس ہی نہیں لوٹا۔
اے آر وائی نیوز کے مطابق کراچی میں کال سینٹر سے ایک شہری کے شارٹ ٹرم اغوا میں ملوث پولیس اہل کاروں کے معاملے میں ایس ایس پی اسپیشل انویسٹیگیشن یونٹ حیدر رضا کی وضاحت سامنے آ گئی ہے۔
ایس آئی یو کے ایس ایس پی نے بتایا کہ انھیں میڈیا رپورٹس کے ذریعے معلوم ہوا تھا کہ محکمے کے اہل کار ملک ارباز کو ایک تاجر کو اغوا کرتے ہوئے گرفتار کیا گیا۔
حیدر رضا کے مطابق ملک ارباز خان ایس آئی یو کراچی میں تعینات ہے، اس نے اپنی شادی کے لیے 16 جولائی کو 10 روز کے لیے رخصت لی تھی، رخصت ختم ہونے کے باوجود وہ مسلسل ڈیوٹی سے غیر حاضر تھا، جس پر 27 جولائی کو ارباز کی غیر حاضری کی رپورٹ روزنامچے میں درج کی گئی۔
شارٹ ٹرم اغوا میں ملوث پولیس اہل کاروں سمیت 5 ملزمان گرفتار
ایس ایس پی ایس آئی یو کا کہنا تھا کہ مسلسل غیر حاضری پر کانسٹیبل ارباز کو برطرفی کا شو کاز نوٹس بھی دیا گیا تھا، اسی سبب کانسٹیبل کی تنخواہ بھی بند کر دی گئی تھی۔
پولیس اہل کاروں نے دکان دار کو شارٹ ٹرم اغوا کر کے سوا 2 لاکھ روپے اینٹھ لیے (ویڈیو دیکھیں)
انھوں نے اغوا کے واقعے پر کہا کہ کانسٹیبل ملک ارباز کا اغوا کا مجرمانہ فعل اس کا ذاتی فعل ہے، اس غیر قانونی فعل سے ایس آئی یو سی آئی اے کا کوئی تعلق نہیں، لہٰذا اس سلسلے میں یونٹ کو بدنام نہ کیا جائے۔
