کراچی: شہر قائد کے علاقے سائٹ ایریا میں پولیس ہیڈ کانسٹیبل کی مقابلے میں شہادت کے سلسلے میں محکمہ پولیس کی تحقیقات میں جائے وقوعہ سے سنگین غفلت و لاپرواہی کے شواہد مل گئے ہیں۔
پولیس ذرائع کے مطابق گزشتہ شب سائٹ اے تھانہ کی حدود اسٹار ٹیکسٹائل مل کے قریب ڈکیتوں سے مقابلے کے دوران شہید ہونے والے ہیڈ کانسٹیبل رمیز بکل نمبر 29048 کی نماز جنازہ ہیڈکوارٹر گارڈن میں ادا کر دی گئی۔
ذرائع نے بتایا ہے کہ تحقیقات میں جائے وقوعہ سے شواہد جمع کر لیے گئے ہیں، نائن نائن ایم پستول کے 7 خول ملے اور پولیس اہلکاروں کی سنگین غفلت و لاپرواہی کے شواہد بھی ملے، پولیس پر حملہ کرنے والے ڈکیت شہید و زخمی اہلکاروں کا اسلحہ بھی چھین کر لے گئے تھے۔
ذرائع کا کہنا ہے کہ ابتدائی طور پر تحقیقات میں واقعے میں غفلت سامنے آئی ہے، جہاں حملہ ہوا وہاں پر 2 موٹر سائیکلوں پر 4 اہل کاروں کی ڈیوٹی تھی، لیکن واقعے کے وقت دو اہلکار موقع پر موجود نہیں تھے۔ پولیس حکام اس کی بات تحقیقات کر رہے ہیں کہ دیگر دو اہلکار کہاں تھے؟ اس واقعے میں حملہ آوروں نے بہ آسانی پولیس اہل کاروں کو نشانہ بنایا تھا۔
دوسری طرف شہید ہیڈ کانسٹیبل رمیز ولد فتح شیر کی نماز جنازہ ادا کر دی گئی ہے، نماز جنازہ میں ایڈیشنل آئی جی کراچی جاوید عالم اوڈھو، زونل ڈی آئی جیز، ضلعی ایس ایس پیز کراچی و دیگر سینئر افسران، رینجرز سندھ کے افسران کے علاوہ شہید کے ورثا اور قریبی رشتہ داروں سمیت اہلیان علاقہ نے بھی شرکت کی۔
جاوید عالم اوڈھو نے شہید کے ورثا سے یک جہتی اور ہمدردی کااظہار کرتے ہوئے شہید کی محکمہ پولیس کے لیے خدمات کو خراج عقیدت پیش کیا، دریں اثنا پولیس کے خصوصی دستے نے شہید کو سلام پیش کیا اور پھولوں کی چادر چڑھائی گئی۔
ایڈیشنل آئی جی کراچی نے مقابلے میں زخمی اور نجی اسپتال میں زیر علاج کانسٹیبل شیر افضل کو بہترین اور معیاری طبی سہولیات کی فراہمی کے ضمن میں ہدایات کے ساتھ ساتھ متعلقہ پولیس افسران کو ہدایت کی کہ شہید کے ورثا کے لیے محکمہ پولیس سندھ کی مروجہ مراعات کے حوالے سے ضروری قانونی دستاویز جلد تیار کی جائیں۔
ادھر ساتھی اہل کار کی شہادت کے بعد پولیس نے ایکشن لیتے ہوئے رات گئے 4 پولیس مقابلوں میں 3 ڈاکو مارے، اور 6 کو زخمی کر دیا، سائٹ ایریا قبر والی گلی کے قریب دو ڈاکوؤں کو مارا گیا، اور ان کے قبضے سے اسلحہ اور موٹر سائیکل برآمد کی گئی، جب کہ لانڈھی چار نمبر پر ایک ڈاکو مارا گیا اور تین زخمی حالت میں گرفتار کیے گئے۔ اجمیر نگری اور موسیٰ لین سے بھی دو ملزمان دھر لیے گئے ہیں۔
